Македонија на детска Евровизија: „Динг динг донг“ и „Прати ми СМС“ имаа најголем успех, а годинава ќе се пее „Маратон“
Македонија учествува на детската Евровизија уште од самиот почеток, односно од 2003 година. Оттогаш, нашите талентирани деца нѐ преставуваа на дури 16 изданија на ова музичко натпреварување.
Детскиот избор за песна на Евровизија е музичко натпреварување што се одржува од 2003 година, а натпреварувачите мора да бидат на возраст од 9 до 14 години. Тоа е основано за да им се даде можност на младите пејачи од Европа да стекнат одредено искуство пред поголема публика пред нивните евентуални настапи на Евровизија.
Препорачано
Македонија учествува на детската Евровизија уште од самиот почеток, односно од 2003 година. Оттогаш, нашите талентирани деца нѐ преставуваа на дури 18 изданија на ова музичко натпреварување.
Марија Арсовска и Викторија Лоба го „скршија мразот“ и нѐ претставуваа со песната „Ти не ме познаваш“ на првото издание на детската Евровизија во 2003 година. Тие го освоија 12. место, но нивната песна е своевиден евергрин, кој сѐ уште се слуша на детските забави.
Во годините што следуваа, на евровизиската сцена застанаа Мартина Силјаноска („Забава“, 2004), Денис Димоски („Роденденски бакнеж“, 2005), Зана Алиу („Вљубена“, 2006), Росица Кулакова и Димитар Стојменовски („Динг динг донг“, 2007), Боби Андонов („Прати ми СМС“, 2008), Сара Маркоска („За љубовта“, 2009), Ања Ветерова („Ео, Ео“, 2010), Доријан Длака („Жими овој фрак“, 2011), Барбара Поповиќ („Охрид и музика“, 2013), Ивана и Магдалена („Плетенка“, 2015), Мартија Станојковиќ („Love Will Lead Our Way“, 2016), Мина Блажев („Dancing Through Life“, 2017), Марија Спасовска („Дома“, 2018), Мила Москов („Fire“, 2019), „Дајте музика“ („Green Forces“, 2021), Јана, Јован и Ирина („Животот е пред мене“, 2022) и Тамара Грујеска („Кажи ми, кажи ми кој“, 2023).
Нашиот најдобар успех го постигнаа Росица Кулакова и Димитар Стојменовски со песната „Динг динг донг“ во 2007 година, но и Боби Андонов со песната „Прати ми СМС“ во 2008 година. Тие го освоија високото 5. место.
За жал, Македонија се најде на последното место дури трипати – во 2006, 2013 и во 2015 година.
Годинава, наши претставници се талентираните Ана Ванчевска и Алексеј Ивановски, кои со песната „Marathon“ ќе ги бранат боите на Македонија на 22. издание на детската Евровизија. Нивната песна е дело на Лазар Цветковски, а текстот го напиша Магдалена Цветковска.
Големото финале ќе се одржи вечерва, со почеток од 18 часот, а Македонската радио-телевизија ќе одржи директен пренос. Нашите претставници ќе настапат со реден број 7, а годинава учествуваат 17 земји учеснички.
