Европското екипно првенство во шах започнува денеска но Македонија – поразително – нема свои претставници. Ниту машка, ниту женска репрезентација ќе настапи на овој значаен настан, што претставува еден од најголемите удари врз домашниот шах во последните години.

Ова отсуство не е резултат на моментална криза или административна грешка, туку, како што велат од шаховските кругови, плод на години неработа, негрижа и управувачка неспособност.

Веќе подолго време постои незадоволство од функционирањето на Шаховската федерација на Македонија, а ова е само кулминација на наталожениот хаос.

Во јавноста веќе се појавуваат повици за оставки на целиот Управен одбор. Според критичарите, ако членовите немаат доблест сами да се повлечат, тогаш ќе следат индивидуални повици – за јавноста конечно да дознае кој ја доведе македонската шаховска репрезентација до ова понижувачко дно.