Македонците во Бугарија добиле забрана за одбележување на Кресненското востание, објави Македонскиот клуб за етничка толеранција. Оттаму велат дека слично како и претходните години, доставиле известување до Општина Кресна дека ќе положат цвеќе пред споменикот на Димитар Поп Георгиев Беровски лоцирано во центарот на градот. Но, непријатно биле изненадени кога од општината добиле известување дека на 20 октомври, датумот кој требало да го одбележат, градот имал планирано други настани.

Востанието на македонскиот народ против отоманската власт е кренато 17 октомври 1878 година во долината на реката Струма во Пиринска Македонија. Димитар Поп Георгиев Беровски бил водач и на Разловечкото и на Кресненското востание.

Минатиот месец Комитетот на министри на Советот на Европа донесе одлука со која од Бугарија побара до 16 декември да одговори какви чекори ќе преземе околу спроведувањето на 14-те пресуди на Европскиот суд за човекови права.

Во Благоевград лани беше отворен, па затворен македонскиот клуб „Никола Вапцаров“.