Претседателката Гордана Сиљановска-Давкова прими делегација на партијата на Македонците во Албанија – Македонската алијанса за европска интеграција (МАЕИ), предводена од нејзиниот претседател, Васил Стерјовски.

На средбата претставниците на единствената политичка партија на Македонците во Албанија со сериозна загриженост укажаа на состојбата на македонското малцинство, истакнувајќи дека се соочуваат со пропаганда и обиди за асимилација коишто го загрозуваат нивниот национален и културен идентитет.

Како што соопшти кабинетот на Сиљановска-Давкова, тие изразиле незадоволство од односот на албанските институции кон нив, како на државно, така и на локално ниво, нагласувајќи дека недоволната заштита и поддршка ја ставаат оваа заедница во неизвесна положба изложена на перманентни притисоци.

Претставниците на МАЕИ побарале поголемо учество на македонските власти, како и нивна помош во надминувањето на енормните проблеми со коишто се соочуваат, при што отворено се пожалиле дека Македонија нема државна стратегија за заштита на положбата на Македонците во Албанија.

Во разговорот, тие ја информирале претседателката за досегашните партиски иницијатви, како и за планираните активности, во правец на зајакнување на нивната национална и културна самобитност, се наведува во соопштението.

Претседателката Сиљановска-Давкова изразила разбирање за влошената положба на македонското малцинство во Албанија.

Таа ја реафирмирала потребата од стратешки пристап во решавањето на статусот и заштитата на правата на македонското малцинство во Албанија, согласно европските и меѓународните документи.