Македонците не се големи фанови на тиквите, ама во недостиг на поголема и поевтина понуда на овошје, наесен посегаат по нив. Особено во октомври, пазарите се преполни со тикви, а цената од 20 до 30 денари за килограм, ги прави достапни за сечиј џеб. Во последните години, има зголемена понуда на оние поголемите, округли тикви, но, нашите сограѓани не ги длабат и не ги претвораат во фенери, онака како што се случува во многу земји во светот за празникот Халоуин (Ноќта на вештерките). Според податоците од Државниот завод за статистика, едно македонско семејство лани изело 3,7 килограми тиква.

Тиквите се растение кое припаѓа на семејството на краставици. Тие може да се јадат сурови или варени. Иако тиквите често се сметаат за зеленчук и се користат како зеленчук во кујната, тие всушност се овошје.

– Годинава имаше премногу дожд, а на тиквите им треба суво време. Сепак, продажната цена е ниска, од 20 до 50 денари за килограм – велат пазарџиите.

За разлика од кај нас, во Словенија на пример, цената на тиквите се движи од четири до десет евра, во зависност од големината и обликот. Дека оваа година владее вистинска еуфорија за тикви сведочи и состојбата на фармата При Јурју во Сподње Битње, каде тие исто така беа распродадени, пишува Н1 Словенија. Според сопственикот Фрањо Вилфан, сезоната започнува со продажба на тикви за јадење, а потоа следат разни хотели, ресторани, како и зоолошки градини, кои ги купуваат за украсување. Од 15 октомври главни клиенти се семејствата.

– Побарувачката се зголемува – вели Вилфан. Тиквите на фармите се продаваат по килограм што чини и до евро и пол. На маркетот Кошешки во главниот град на Словенија, тиквите се продаваат за 1,5 евра за килограм, а на централниот љубљански пазар ќе платите околу две евра за килограм. Во „Спар“ забележуваат дека од година во година се зголемува интересот, а секоја година се зголемува и продажбата. Годинава нудат само словенечки украсни тикви со тежина од два до четири килограми, а сегашната редовна цена е 1,19 евра за килограм. Во „Хофер“ не продаваат украсни тикви, во „Меркатор“ нудат неколку видови украсни тикви, во „Туш“ повеќето се веќе распродадени, а во „Лидл“ една тиква чини нешто под пет евра.

Кина, со годишно производство на тикви од 8,4 милиони метрички тони, е најголемиот производител во светот за 2024 година. Потоа следат Индија, Русија, Украина и САД. Зголемувањето на површината за одгледување тикви во Полска од 1,1 илјади хектари на 8,9 илјади хектари помеѓу 2014 и 2022 година, како што покажуваат податоците на Евростат, претставува значителен раст во одгледувањето тикви.

Домашната берба на тикви се зголеми од 48.000 тони во 2014 година на приближно 400.000 тони во 2022 година. Ова зголемување укажува на осумкратно зголемување на производството на тиква во наведениот период, се вели во соопштението за печатот. До 2022 година, жетвата на тиква во ЕУ надмина 1 милион тони, што бележи раст од 3 отсто на годишно ниво. Придонесот на Полска во вкупната жетва на тиква во ЕУ беше приближно 40% во 2022 година. Покрај Полска, значајни производители на тикви во ЕУ беа: Франција (207.000 тони – 20 отсто од уделот во производството на ЕУ), Шпанија (128.000 тони – 9 отсто) и Португалија (81.000 тони – 8 отсто). Уделот на првите пет производители во 2022 година изнесува речиси 90% од вкупното производство на ЕУ.

Трговците тријат раце од продажбата на тикви, маски и слатки

Ноќта на вештерките, како празник потекнува од келтскиот празник Самхаин, но подоцна во IV век, кај Англичаните го добил името Ноќта на вештерките, што е скратена форма на фразата „ол халоус’ив“ или во превод, „предвечерие на празникот на Сите светци“. Веројатно знаете дека тој се паѓа на последниот ден од октомври, а со него доаѓаат тиквите, хорор филмовите, бонбоните и забавата. Инаку, според католичките власти, Ноќта на вештерките е директно против католичкиот празник Сите светци. Во 2009 година, Ватикан ја осуди зголемената популарност на Ноќта на вештерките, нарекувајќи го „антихристијански“ и „опасен“.

Ноќта на вештерките сега ги презеде пропорциите на секуларна прослава. Воедно, ова е датум на кој со нетрпение очекуваат и трговците кои задоволно ги тријат рацете бидејќи продаваат голем број маски и костими, како и тикви.