Во куќа во Штип, во убаво опремена просторија со компјутери и електроника бил „домот“ на илегалното онлајн коцкање што го приредувале домаќините. Иако нерегистрираното коцкање се одвивало на интернет, сепак од ова „седиште“ организаторите ги поставувале кодираните имиња на учесниците и биле режисери на коцкарската забава за која наоѓале клиенти однапред и морало да бидат исклучиво Турци. Малку понастрана, во другиот дел од истата куќа пак, се наоѓал „пленот“ и заработката од ваквиот нечесен бизнис – бесни возила од брендовите „Ауди“, Порше Хибрид“, „Мерцедес Бенц“, „Мини купер“, половина килограм злато, моторцикли, четирицикли итн.

Сопствениците на „куќата за коцкање“ имале купено и три стана и две гаражи. Обвинителството за гонење организиран криминал и корупција нив ги товари  дека изминатите 4 години, неовластено приредувале игри на среќа а црните пари ги переле на начин што купувале движен и недвижен имот – погоренаведениот. Додека се водела истрагата за овие две лица, паралелно имало постапка за уште двајца за перење пари. Едниот се спогодил и добил условна казна.

Но, она кое што е интересно за овие луѓе, е дека биле поврзани со „босот“ на онлјан коцкањето, тајкунот од Северен Кипар Халил Фаљали, кој беше ликвидиран во 2022 година и не дочека да се брани во истрагата за мегаломанската мрежа на нерегистрирано онлајн-коцкање што ја создал, поради што живееше во вонсериски, агресивен луксуз.

Според сознанијата до кои дојде Обвинителството за гонење организиран криминал и корупција, постојат индиции што покажуваат поврзаност со споменатото лице (Халил Фаљали н.з.) но истите треба да бидат потврдени што е предмет на меѓународна соработка и во моментов не може да се споделуваат повеќе информации, велат од ОЈО ГОКК за „Слободен печат“.

Халил Фаљали, бизнисмен од кипарските Турци, познат по блескавиот живот и политичките конекции, беше ликвидиран во 2022 година. По неговата смрт неговата вдовица Озге Фаљали се поврзува со капитал во Дубаи вреден 60 милиони евра.

Во најновото истражување на OCCRP, се открива дека во разработената мрежа за нелегално онлјан-коцкање на Фаљали имало и македонски државјани најмени да ја развиваат, за лукративни цели.
Турските власти веќе заплениле над 40 милиони долари средства од групата во Турција, а во декември лани, повеќе од 240 лица вклучително и вдовицата на Фаљали, беа обвинети за нелегално коцкање и перење пари.

Еден од осомничените за ликвидацијата на Фаљали е неговиот поранешен прв човек за финансии, кој во ексклузивни интервјуа за OCCRP и за Истражувачка репортерска лабораторија од затвор посочил и македонски конекции во илегалниот коцкарски онлајн бизнис, кој според него – правел 80 милиони евра месечно на светско ниво. Менаџерот за финансии на Фаљали кој сега е осомничен дека е еден од организаторите на неговото убиство, за истражувачките новинари тврдел дека не е вмешан во ликвидацијата – туку дека „многу знае“ за тоа каде Фаљали потплатувал високи официјални лица, функционери и службеници. Во еден дел од истражувањето се вели:

„Беа испратени тимови во странство да работат на места како Малта, Белорусија и Северна Македонија, за да ја поддржат инфраструктурата за плаќања зад обложувалниците“, пишува OCCRP.

Во истражувањето на ИРЛ пак, кое се однесува на мрежата на Фаљали во Македонија, во ексклузивно интервју за нив од затвор во Холандија, долгогодишниот шеф на финансии на Фаљали – Џемил Онал, изнесува детали за тоа како мрежата функционира во Македонија. Во интервјуто тој посочува дека во Македонија функционирал кол-центар каде работеле студенти што повикувале луѓе што се коцкаат во Италија, Македонија и Словенија – а студирале на Меѓународниот балкански универзитет.

Нашите соговорници не знаеја точно да ни кажат што се работело во кол-центарот, но едниот од нив се сети на имињата на тројца студенти. Некои доцнеле наутро на часови, спиеле во своите автомобили на паркингот пред универзитетот. Кога ќе ги прашав зошто се уморни и зошто спијат на паркингот, тие ми велеа: ‘Казино, пари, пари!’“, се сеќава нашиот соговорник, пишува ИРЛ.

Според тврдењата на Џемил Онал за ИРЛ, групата на Фаљали нелегално заработените пари ги подигала во кеш. Потоа ги користела услугите за перење пари и на група со која раководело лицето Реза Зараб – инаку добитник и на македонско државјанство, покрај тоа што има државјанства на Турција, Иран и Азербејџан. Пратениците во Собранието, за неговото државјанство си ја префрлаа топката уште пред две години, кога овој контроверзен човек беше уапсен во САД под сериозни сомневања за перење пари и измама.

Организацијата на ликвидираниот Халил Фаљали според турското обвинителство – регрутирала илјадници луѓе да отвораат банкарски, кредитни картички, криптовалути и сметки за онлајн плаќање за да ги преместат приходите од незаконски коцкање. Долгогодишниот шеф на финансии на Фаљали, Џемил Онал, изјави за OCCRP дека овие операции генерирале најмалку 80 милиони долари секој месец. Целото истражување на ИРЛ може да го прочитате овде.