Неодамна во издание на издавачката куќа „Макавеј“ излезе од печат книгата „На врв од острицата“ со критики и есеи на Сузана В. Спасовска, кои претставуваат плод на 25-годишната критичарска творечка активност на авторката.

Книгата содржи шест циклуси: Критика на денот, Непрежалената периодика, Во слава на живата реч, Антологиски предизвик, Од светот на реалното до небеската река и Вонкнижевни парадигми, во кои се поместени новински критики, интерпретации и анализи објавувани во книжевната периодика, промотивни беседи, како и реферати претставувани на научни симпозиуми и конференции.

На крајот на книгата е поместен критички осврт кон книгата потпишан од Соња Стојменска-Елзесер. Во поговорот на рецензентката, меѓу другото, е пишува: „Она што ги обединува овие текстови е живиот, страстен и едуциран интерес на Спасовска за македонската литература и во тие рамки, доминантно за поезијата“.

Тема на интерес и на книжевна анализа се делата не само на македонските класици, како Конески, Јаневски, Шопов, Поповски, Андреевски, Урошевиќ, Павловски, Ренџов, Тодоровски, Ѓузел, туку и на следните генерации писатели: Анчевски, Даниловски, Михајловски, Димоски, Крушкаровски, Гилевски, Исаковски, Додовски, Де Одорико, Смилевски и други.

Книгата завршува со текстови со културолошки карактер, како што се оние за божествената љубов на Аница Савиќ-Ребац, за Орфеј како парадигма за мислењето, за колективниот идентитет низ призмата на религијата, за солидарноста како виш аспект на хуманизмот.

Книгата содржи над 300 страници, а изданието е поддржано од Министерството за култура на РСМ, како дел од Годишниот конкурс за проекти од национален интерес за 2024 година.

Сузана В. Спасовска (1972) дипломирала, магистрирала и докторирала на Филолошкиот факултет „Блаже Конески“ во Скопје. Објавила седум стихозбирки, една антологија и една научна студија за слободниот стих (2021).

Работи на Факултетот за странски јазици при Универзитетот „Американ колеџ“ во Скопје како лектор по македонски јазик. Уредник е во електронското списание за литература и други уметности „Блесок“. Член е на Друштвото на писателите од 2019 година, а од оваа година и член на Управниот одбор на ДПМ.

(Текстот е објавен во „Културен печат“ број 252, во печатеното издание на весникот „Слободен печат“ на 19-20.10.2024)