По пауза од цели 23 години, Националната кошаркарска асоцијација (НБА) повторно се враќа на телевизиските екрани на „NBC“, откако оваа медиумска куќа ги доби ексклузивните права за пренос на натпреварите во САД, почнувајќи од следната сезона. Ова ќе биде трет пат во историјата НБА да се емитува на „NBC“, откако првично лигата се пренесуваше во периодот од 1954 до 1962, па потоа од 1990 до 2002 година.

Посебна доза носталгија ќе почувствуваат љубителите на кошарката од 90-тите години, кои се сеќаваат на препознатливата најава „This is the NBA on NBC“, проследена со легендарната музичка тема „Roundball Rock“. Иако гласот зад најавата, актерот Џим Фејган, почина во 2017 година, неговото присуство ќе се почувствува и оваа есен, благодарение на вештачка интелигенција и согласност од неговото семејство, „NBC“ ќе ја врати познатата најава во оригинален облик.

Но, тоа не е единствената новост, подготвена е и импресивна екипа за новата НБА ера. Стандардната постава ќе ја сочинуваат поранешните НБА ѕвезди Кармело Ентони, Винс Картер, Реџи Милер и Џамал Крафорд. Сепак, она што најмногу го привлече вниманието е веста дека Мајкл Џордан, човекот кој е синоним за кошаркарска величина, ќе се појави во улога на специјален коментатор и аналитичар.

Ова ќе биде прво постојано појавување на Џордан на телевизија од крајот на неговата последна играчка сезона 2002/2003. За многумина, токму неговата анализа и присуство на малите екрани ќе бидат најголемата атракција и нова димензија во доживувањето на НБА лигата.