Американското списание „People“ го прогласи Мајкл Б. Џордан за најсекси маж во 2020 година. Списанието вчера објави дека актерот од „Black Panther“ ја добива честа да биде нивен избор.

33-годишниот актер е еден од најпосакуваните ергени во Холивуд, а својот љубовен живот го држи далеку од очите на јавноста. Неговото признание за најсекси маж на годината, го „турна“ музичарот Џон Леџенд од тронот.

Џордан ги воодушеви критичарите со својата мала, но важна улога на Валас во криминалистичката драма „The Wire“ во продукција на „HBO“. Подоцна се приклучи на екипата на серијата „All My Children“ во 2013 година, заменувајќи го својот иден колега во „Black Panther“, покојниот Чедвик Боузман. Џордан го играше Винс Хауард во драмата „Friday Night Lights“ во продукција на „NBC“, а за портретирањето на убиениот Оскар Грант во биографската драма „Fruitvale Station“ во 2013 година доби многу коментари од филмските критичари.

Во 2015 година, актерот играше во многу акциони филмови, но неговата најголема улога до сега може да се каже дека е улогта на Ерик Килмонгер во „Black Panther“.

По тој филм, Џордан раскажа дека да се влезе во умот на некој толку злобен човек му наштетило на менталното здравје. Тој во интервју со Опра Винфри во февруари 2019 година изјави дека почнал да посетува терапевт.

„Малку паднав во депресија. Ми беше тешко… Искрено, терапијата, самиот разговор со некого беше нешто што навистина многу ми помогна… Секој треба да се расплаче некогаш и да разговара“, изјави Џордан.

Неговите обожаватели со нетрпение очекуваат да го видат со нова улога во претстојниот шпионски трилер „Without Remorse“.