Труење со храна е причината за смртта на 36-годишната жена и нејзината четиригодишна ќерка во тетовското село Слатино, потврди првичниот обдукциски наод. Деветгодишниот син, кој имал благи симптоми на труење, е во добра состојба, а таткото најверојатно не ја јадел затруената храна.

Дополнителни анализи ќе утврдуваат какви токсини ја предизвикале трагедијата. По наредба на обвинителството, земени се мостри од секој вид и тип на храна што бил затекнат во семејната куќа. Телма објави дека патолозите исклучуваат дека се работи за консумирање отровни печурки. Исто така, земени се примероци од крв и урина од таткото и синот, како и примероци од желудникот на починатите.

„Првичните сознанија од наредената обдукција упатуваат на труење како веројатна причина за смрт на лицата, па од починатите се земени примероци за дополнителни токсиколошки анализи со цел да се утврди причината за труењето. Кај починатите не се пронајдени други траги на насилство“, соопштија денес од Јавното обвинителство.

Од Институтот за судска медицина го информирале тетовското обвинителство дека комплетните и конечни резултати од анализата на примероците и материјалот од починатите ќе бидат готови за неколку дена и тогаш се очекува да се прецизира изворот на труењето и начинот на кој отровите биле внесени во телата на жртвите.

Мештаните во Слатино се децидни дека педесетгодишниот татко на семејството, Ракип Шасивари, нема никаква вина во трагедијата, и додаваат дека пред дваесетина години тој имал слична трагедија – сообраќајна незгода во која загинале неколку членови на неговото семејство, а тој останал речиси парализиран и не може да се движи без помагала.

Според информациите на Телма, во куќата на семејството Шасивари имало храна во многу лоша состојба, со поминат рок и очигледни знаци на скапување. Тим од ИЈЗ зел примероци, а анализата би требало да биде готова до крајот на неделата.