Во преполната сала на Националната опера и балет со публика која реагираше со силни емоции и гласни овации на 15 јуни незаборавен концерт одржа маестралниот композитор и музичар Кирил Џајковски.

Присутните на концертот на Кирил Џајковски имаа вистинска привилегија да ги споделат неговите музички и уметнички светови. Придружуван од 30-член оркестар под диригентската палка на Џијан Емин и раководен од концерт-мајсторот Јане Бакевски во програмата на концертот Џајковски изведе некои од највпечатливите музички теми од филмовите „Големата вода“, „Прашина“, „Сенки“, „Балканот не е мртов“, „Врба“, „Бал-кан-кан“, „Piargy“, „Трето полувреме“.

Концертот беше своевидно резиме на 25-годишното творештво на Кирил во применетата, филмска музика преку комплексно патување, каде публиката не може да остане само пасивен консумент, туку таа се ангажира како проактивен учесник во патувањето. Така, уште еднаш се потврди дека музичкиот јазик на Џајковски има уникатна вредност која е препознаена од публиката.

Филмската музика на Кирил не само што ги надополнува и издига филмските сцени, таа и живее независно од филмот. Еден од највпечатливите моменти на концертот беше изведувањето на темите од филмот „Големата вода“, кои важат за едно од најмагичните дела од македонската филмска музика, но и сведоштво за раскошниот талент на Џајковски.

Значајна улога во изведбата на композициите имаше настапот на солистите, а прв меѓу нив е виолинистот Владимир Крстев, со кого Џајковски има долгогодишна соработка, а високо ниво на изведба имаа и Игор Иванов, Ратко Даутовски, Андреј Трајковски и Антоние Весковски. Крешендото на ова композиторско волшепство на Џајковски беше поддржано од хорската придружба во последниот дел од концертот.

Кирил уште еднаш потврди дека со своите уметнички визии и неговиот композиторски капацитет е уникатно современо културно наследство. Концертот претставуваше одлична можност еден од најпродуктивните композитори на музика за филм на Балканот пред македонската публика да го претстави својот извонредно обемен и исклучително значаен опус. Се најавува дека проектот ќе го продолжи својот живот со настапи низ регионот и Европа во периодот што следува.

(Текстот е објавен во „Културен печат“ број 286, во печатеното издание на весникот „Слободен печат“ на 21-22.6.2025)