Европскиот ракомет доби  германско дерби помеѓу Магдебург и Фуксе Берлин во финалето од Лигата на шампионите. Ракометарите на Магдебург приредија вистинска драма во полуфиналниот дуел против Барселона, каде по голема борба излегоа како победници со 31-30.

Каталонците одлично го отворија натпреварот и на моменти делуваше дека сигурно чекорат кон ново финале. Со предност од четири голови (16-12), изгледаа како да го имаат мечот под контрола. Но, Магдебург не се предаде – до крајот на првиот дел го анулираше водството и на пауза се замина со нерешени 18-18.

И второто полувреме Барса го почна подобро, поведе со 24-21, но токму тогаш почна нивниот пад. Германскиот шампион за првпат стигна до водство во 46. минута (25-24), а проблемите на каталонскиот тим се продлабочија со повредата на Дика Мем, кој не се врати на теренот.

И покќ Барселона успеа и во последните осум минути повторно поведе со 29-27. Но, Магдебург одговори со две брзи акции и израмни на 29-29. Возбудливата завршница кулминираше кога по водството на Барса (30-29), следуваа два црвени картона, а Хорнке прво израмни, а потоа и со гол во последните секунди ја донесе победата за Магдебург.

Во големото финале, Магдебург ќе се соочи со Фуксе Берлин, кој во првото полуфинале го прегази францускиот Нант со 34-24.

Вреди да се напомене дека овој полуфинален спектакл го водеа македонските арбитри Ѓорѓи Начевски и Славе Николов.