Екипата на Маџари во следната натпреварувачка сезона ќе биде дел од елитната конкуренција откако и во вториот натпревар беше подобра од младиот состав на МЗТ Скопје Уни Банка.

На реваншот одигран во СЦ „Јане Сандански“, кошаркарите на Маџари дојдоа до победата (78:55), и со максимални 2:0 ја затворија полуфиналната серија од плеј-офот, што значи и нивни прв, историски пласман во Првата лига. Димчевски реализираше 17 поени за екипата од Маџари, Димитровски даде 14, а Митков уште 13 поени. Капитенот Ангеловски забележа 25 поени за МЗТ Скоје Уни банка.

Во вториот натпревар, оној во Штип, екипата на Соколи 1933 му се реваншираше на Ангели. По голема борба, штипјани стигнаа до посакуваниот триумф (80:71) со кој израмнија на 1:1 во оваа серија, по што стана јасно дека ќе се игра и трет меч, кој ќе го одреди и вториот патник во Првата лига.

Капитенот Караколев го предводеше тимот на Соколи 1933 со 25 поени, а во гостинската екипа, Стојанов броеше до 22.

Мајсторката ќе се игра во салата „Независна Македонија“ во Скопје.