Доналд Трамп би сакал со лисици на рацете да се појави пред суд, ако биде приведен поради обвинение во врска со случајот „Сторми Дениелс“, им кажал поранешниот американски претседател на своите советници.

Трамп очекува во секој момент да биде објавено обвинувањето дека во предизборната кампања во 2016 година се обидел да прикрие дека преку адвокатот Мајкл Коен ѝ платил 130.000 долари на порно старлетата Сторми Дениелс за да молчи за аферата што ја имала со него. Парите ги дал адвокатот, а Трамп потоа му ги исплатил со чекови од по 35.000 долари.

Поранешниот претседател во петокот ги повика своите симпатизери масовно да демонстрираат против „политичкиот прогон“. Откако повеќето симпатизери не се одѕваа на повикот, стравувајќи дека може да бидат уапсени, Трамп се решил од апсењето да направи спектакл што ќе може во кампањата за претседателските избори в година да го користи за утврдување на својот рејтинг меѓу конзервативците.

Ако биде објавено обвинение, Трамп ќе биде обврзан да се пријави во Окружното обвинителство во Њујорк, каде што ќе го фотографираат, ќе му земат отпечатоци од прстите и ќе го пуштат судењето да го чека на слобода. Ако, пак, не се пријави самиот, обвинителството ќе побара од сојузната држава Флорида, каде што Трамп престојува, да го екстрадира во Њујорк. При такво сценарио, налогот за екстрадиција би морал да го потпише гувернерот Рон Десантис, кој му е најсериозниот противник на Трамп за претседателската номинација од Републиканската партија.

– Тој пресметал дека ако веќе мора да оди пред суд, да се предаде и да го фотографираат со табличка пред лента за височина, нека биде тоа спектакуларно – раскажале анонимните извори цитирани од весникот „Гардијан“.

Тие тврдат дека Трамп инсистирал рацете да му бидат врзани зад грб, за да може поилустративно пред гласачите да се прикаже како жртва на политички прогон. Тој, исто така, пресметал дека спротивно на неговите амбиции би било сослушување преку видео-врска или протнување во обвинителството низ задниот влез, далеку од новинарските објективи. Таквата „претстава“ се очекува најдоцна до идната среда, кога изминува крајниот рок за поротата да го објави заклучокот дали треба да биде покренато обвинение.

Иако советниците и телохранителите го предупредиле дека при спектакуларното приведедување би му била загрозена безбедноста, тој одговорил дека „не му е грижа дали некој ќе пука во него, бидејќи така би можел да стане маченик“, а потоа и додал дека „ако го застрелаат, сигурно ќе победи на претседателските избори во 2024 година“.

Одлуката дали поранешниот претседател ќе биде приведен со рацете во лисици и дали воопшто ќе се појави пред толпата и пред објективите треба да ја донесе окружниот обвинител Алвин Брег. Не е познато ни што ќе биде опфатено со обвинението, ако воопшто и го има. Правниот тим на Трамп очекува обвинување за фалсификување деловни документи и даночна измама, бидејќи не е платен данок за парите што ѝ биле исплатени на старлетата.