По сениорската, кошаркарките на Баскет Кам ја освоија и онаа во јуниорска конкуренција. Баскет Кам 2011 од Македонска Каменица е нов државен шампион во женската М18 лига за сезоната 2022/2023.

Во големото финале составот од Македонска Каменица беа подобри од Крива Паланка со резултат 69:50 во салата „Кирил и Методиј“.

Веднаш по завршувањето на финалниот натпревар, беше избран и најкорисниот играч на турнирот. Кошаркарката на Баскет Кам 2011, Марија Николов ја освои главната индивидуална награда на собирот во Македонска Каменица.

Ова признание го додели Јелена Антиќ, селекторот на женската репрезентација „Под 18“ години. Николов имаше две одлични партии, како во полуфиналето против Бадел 1862, така и во финалниот меч против ривалот од Крива Паланка.

Во последниот натпревар од сезоната, Николов реализираше 28 поени (2/8 за три, 8/16 за два и 6/10 за еден поен), додаде и шест асистенции, пет скока, три освоени и четири загубени топки за 37:34 минути поминати во игра. Односно 22 индексни поени, најдобар индивидуален ефект и во финалето.