Состојбата во „Комунална хигиена“ е нормализирана и продолжи редовното собирање на смет, истакнаа денеска на прес конференција директорката на претпријатието Косана Мазнева и градоначалничката Данела Арсовска . На обвинувањата дека тоа не се гледа на терен, Арсовска нагласи дека во чистењето се вклучени и други јавни претпријатија, но дека е тешко за пет часа да се исчисти она што се натрупало во изминатите денови.

Мазнева пак појасни што се случувало во претпријатието и зошто дошло до блокада на работата, за што ги обвини мафијашките структури во „Комунална хигиена“.

Неколку дена, една група вработени кои повеќе од 15 години ја држат трета смена во претпријатието, спротивно на законите и на колективниот договор, а повеќе од нив воопшто не се појавуваат на работното место, го блокираат редовното работење на претпријатието и овие неколку дена не дозволуваа да биде исчистен сметот во град Скопје. Иако навремено беа известени надлежните институции им беше дозволено и понатаму да продолжат со самоволието и со незаконската блокада на претпријатието. Само откако притисокот на јавноста стана неподнослив, надлежните органи си ја завршија својата работа и ја отстранија блокадата на претпријатието – рече Мазнева, која смета дека блокадата била со цел да се наруши нејзиниот и кредибилитетот на претпријатието, но и кредибилитетот на Арсовска.

Таа нагласи дека претпријатието е во одлична кондиција, дека за првпат од 2007 година годинава е исплатен к-15, заштитната опрема е обновена, а решено е и усогласувањето на минималната плата.

Арсовска пак, целосно ја поддржа Мазнева и нејзината храброст да се справи после 30 години, како што рече со мафијашите во претпријатието.

Откривме луѓе што се во Германија пет години, возат камиони, трајно се отселени и земаат плата. Мора да се расчисти со овие работи, со политиканството на партиите кои 30 години знаеле што се случува во јавното претпријатие, а ништо не презеле – рече градоначалничката.

Таа повторно посочи дека во претпријатието има вработено 70-тина лица од две фамилии, а некои од нив воопшто не одат на работа и земаат плата. За сите оние што од една фамилија одат на работа и чесно работат, како што рече, за нив има место во претпријатијата.