Шведската компанија за продажба на облека „H&M“ објави скромен раст на приходите во зимскиот квартал, но и драстичен пад на добивката во споредба со лани, нагласувајќи ги попустите и инвестициите во нови модни линии и неповолните валутни движења, пренесува хрватски „Индекс“.

Во периодот од декември до февруари, првиот квартал од фискалната 2025 година, нето приходите на „H&M“ се зголемиле за три отсто, на 55,3 милијарди шведски круни (5,11 милијарди евра).

Нето добивката изнесува 579 милиони круни (53,6 милиони евра) и е приближно половина од истиот период во фискалната 2024 година.

Профитабилноста на „H&M“ беше оштетена од „негативни надворешни фактори“, попусти и инвестиции во нови модни линии, објаснува менаџментот.

Компанијата ги зголемила своите трошоци за маркетинг за поуспешно да се натпреварува со конкурентите „Zara“ и „Shein“, но инвестицијата полека се исплаќа, со анемичен раст на продажбата и послаба профитабилност.

Во март приходите изразени во локална валута пораснале за еден процент, четирипати послабо од истиот месец лани.

Меѓу „надворешните ризици“ за бизнисот, менаџментот ги издвои временските услови, геополитичките настани, странските валути и царините.