Звучи како лоша балканска шега – Црногорците би сакале да работат уште помалку. Но, работата е сериозна. Владејачкото движење „Европа сега“ вети седумчасовно работно време, на што многумина со нетрпение се надеваат, додека работодавците протестираат.

Дали работното време во Црна Гора ќе биде за еден час пократко и од кога ќе се знае по преговорите што ги водат Владата, репрезентативните синдикати и работодавците. На последниот Социјален совет, најнезадоволни беа градежниот и туристичкиот сектор, кои веќе работат сезонски и со хроничен недостаток на работна сила- објави Данас.рс.

„Ова би значело темелна реорганизација на работните места, зајакнување на прекувремената работа и прераспределба на работното време (за што постојат сериозни законски ограничувања) и дополнителни трошоци или нови вработувања што многумина не можат да ги финансираат. Скратувањето на работното време за повеќето работни места во туризмот е апсолутно невозможно“, според Синдикатот на работодавци на Црна Гора.

Од Министерството за труд, вработување и социјален дијалог, пак, велат дека од 1 јануари оваа година до денес, Инспекторатот за труд не ја евидентирал потребата од воведување прекувремена работа во економскиот сектор.

„Процесот на имплементација ќе биде внимателно испланиран, во соработка со синдикатите, работодавачите, академската заедница и други релевантни актери. Фокусирани сме на анализи што ќе покажат како седумчасовниот работен ден може да се имплементира во пракса, без да се загрозат економските перформанси“, изјавија за ДВ од кабинетот на министерката Наида Нишиќ.

Речиси 80.000 луѓе работат во јавниот сектор на малата Црна Гора, што е една третина од вкупниот број вработени во земјата. Пренатрупаната, претежно партиска администрација е често бавна и неефикасна.

Приватниот сектор затоа ја повикува државата да се справи со оптимизацијата на јавната администрација, зголемувањето на нејзината ефикасност, но и потиснувањето на сивата економија и злоупотребата на боледувањата, пред да го намали работното време.

Доколку измените на Законот за работни односи што предвидуваат воведување на седумчасовно работно време добијат поддршка од мнозинството во Парламентот Црна Гора ќе стане првата земја во регионот и во Европа што законски ќе го дефинира седумчасовното работно време.

Франција е најпознатиот пример за работа со скратено работно време со законска норма од 35 часа неделно (што е во просек 7 часа дневно), но ова не е експлицитно дефинирано како „седумчасовно работно време“.