Центарот за нови иницијативи во уметноста и културата „Локомотива“ го најави почнувањето на проектот „DanceMap“, особено значајна иницијатива за развој, заштита и промоција на европското танцово наследство. Конзорциумот од европски организации, универзитети и институции кој ја започна иницијативата успеа да добие поддршка од програмата „Horizon“ на Европската Унија за финансирање истражување и иновации, за првпат во областа на танцот, а и за првпат во областа на уметноста во Македонија.

„DanceMap“ е пионерска иницијатива за наследство финансирана од „Horizon Europe“, програма на Европската Унија за истражување и иновации. Овој амбициозен проект, кој ќе трае три години, од јануари 2025 до декември 2027 година, е дел од истражувачкиот кластер „Култура, креативност и инклузивно општество“ и има за цел да развие меѓусекторска стратегија за заштита и промоција на богатото танцово наследство на Европа.

Координатор на иницијативата е „Биро Ритер“ (Bureau Ritter), која е составена од конзорциум од шеснаесет истражувачки центри, универзитети, танцови архиви, уметнички организации и експерти за политики од десет земји. Заедно, тие работат на создавање на „нацрти“ или „патокази“ за ефективни и одржливи политики за европското танцово наследство, употребувајќи интегриран пристап што вклучува емпириско истражување, статистички податоци, истражување на уметнички практики, теориски прегледи, архивирање, комуникација и информирање на јавноста, застапување и креирање на политики.

Конзорциумот верува дека ќе оформи пристап кој е пренослив и ќе може да служи како модел за понатамошни истражувања, градење на архиви, теориска надградба, односнио градење на танцово културно наследство и заштита на оваа уметничка форма и други кои се поврзани со практики на тело и форми на нематеријално културно наследство, посочија од тимот на „Локомотива“.

Во следните три години, „DanceMap“ ќе истражува и мапира и ќе ја зголеми видливоста на постојните иницијативи за танцово наследство низ Европа, создавајќи сеопфатен директориум на архиви, колекции и бази на знаења.

Проектот ќе развие интерактивна дигитална платформа што ќе вклучува дигитален простор за работа на истражувачите и куриран вебсајт наменет за јавноста. Платформата ќе понуди уникатен увид во разновидноста и богатството на европското танцово наследство, правејќи го достапно и привлечно за глобалната јавност.

Ќе напредува холистички, уметнички воден пристап базиран на истражувања и теориски промислувања кон заштитата на нематеријалното културно наследство, комбинирајќи дигитални алатки со методи базирани на практики.

Исто така, ќе застапува за зајакнување на јавните политики кои го признаваат и поддржуваат зачувувањето и промоцијата на танцовото наследство на локално, национално и европско ниво.

Конзорциумот „DanceMap“, покрај „Локомотива“ – Центар за нови иницијативи во уметноста и културата (Скопје, Северна Македонија), е составен од координаторот на проектот Bureau Ritter / Биро Ритер (Берлин, Германија) и Центарот за истражување на танцот при Универзитетот Ковентри (Ковентри, Обединето Кралство), University of Antwerp / Унивезитетот на Антверпен (Антверпен, Белгија), истражувачката група „Motion Bank“ при University of Applied Sciences Mainz / Универзитетот на применети науки во Мајнц (Мајнц, Германија), Deutsches Tanzarchiv Köln / Германска Танцархива Келн (Келн, Германија), STUK House for Dance, Image and Sound / СТУК Центар за танц, слика и звук (Левен, Белгија), Culturgest / Културжест (Лисабон, Португалија), Noa Eshkol Foundation / Ноа Ешкол фондација (Тел Авив, Израел), Station Centre for Contemporary Dance / Станица Центар за современ танц (Белград, Србија), Nomad Dance Academy Slovenia / Номад Танц Академија Словенија (Љубљана, Словенија), Nomad Dance Academy Croatia / Номад Танц Академија Хрватска (Загреб, Хрватска), Brain Store Project / Брејн Сторе проект (Софија, Бугарија), Rosas / Росас (Брисел, Белгија), Culture Concepts / Културни концепти (Берлин, Германија), Goethe-Institut / Гете Институт – партнер за соработка (Германија), известија од тимот на „Локомотива“.