Партијата на проевропската молдавска претседателка излезе на врвот на локалните избори во стотици градови одржани изминатиот викенд, но не успеа да ја добие градоначалничката функција во најголемите градови, вклучувајќи го и главниот град Кишињев, покажуваат прелиминарните резултати од изборите објавени денеска.

Изборите во неделата, на кои беа избрани 12.000 локални функционери, вклучувајќи го и градоначалникот на Кишињев, беа тест за проевропската политика на претседателката Маја Санду и беа проследени со обвинувања за руско мешање, што Москва ги негира. Владејачката Партија за акција и солидарност (ПАС) на Санду освои повеќе од 40 отсто од гласовите за градоначалници, градски советници и општински и селски совети.

Таа победи во првиот круг на гласање во 240 од вкупно 898 села и градови. Тие победи беа главно во руралните области и нејзините кандидати не освоија контрола во големите градови. Во главниот град, актуелниот градоначалник Јон Цебал денеска изјави дека ја победил Лилијан Карп од ПАС, тесно избегнувајќи втор круг со 50,62 отсто од гласовите, според прелиминарните резултати.

Кога станува збор за другите градови, трката за градоначалник на Балти оди во вториот круг, во Кахул градоначалникот ќе биде независен кандидат, а во Орхеи во првиот круг победи независен кандидат поврзан со пребегнатиот бизнисмен Илан Шор.

Пред изборите, Санду ја обвини Русија за „купување“ гласови со инвестирање на 5 милиони американски долари во „криминални групи“ поврзани со Шор, кој живее во странство и беше осуден во отсуство за неговата улога во банкарска измама. На проруската политичка партија поврзана со Шор не и беше дозволено да учествува на изборите од безбедносни причини.

Министерот за инфраструктура Андреј Спину, потпретседател на ПАС, рече дека главната порака на изборите е дека „проевропската партија секако победи низ целата земја“. Ова беа последните избори во Молдавија пред претседателските избори во ноември следната година.