Судејќи според амбициозните буџети што скопските општини ги испланираа, а советниците ги усвоија, во 2025 година граѓаните можат да очекуваат многубројни инфраструктурни проекти, изградба на градинки, игралишта, паркови, реконструкција на улици, разноразни субвенции за граѓаните и многу други проекти што треба да го подобрат секојдневното функционирање на жителите и да овозможат развој на општините.

За очекување е дека голем дел од зацртаните проекти за кои се предвидени средства во општинските каси ќе бидат реализирани, затоа што станува збор за изборна година, кога претстојат локалните избори, па градоначалниците тогаш се најактивни во очекување да добијат некој глас повеќе за себе, доколку одат на уште еден мандат или за своите партии.
Сите тие се пофалија дека буџетите се развојни, дека се фокусирани на потребите на нивните жители, но и дека во нивното креирање удел имаат и граѓаните што предлагале идеи и проекти, од кои дел се вградени во буџетите.

Буџетот на Општина Бутел е проектиран на 828 милиони денари, од кои 178 милиони се наменети за капитални инвестиции. Предвидени се пари за парк во населбата Радишани, за пешачка патека покрај река Серава, за детска градинка во Бутел 2, за уредување на коритото на Серава, за реконструкција на клучните сообраќајници во општината, но и на помали сервисни улици, изградба на нова и реконструкција на постојната атмосферска и фекална канализација, изградба на детски игралишта, спортски игралишта и друго. Предвидени се, меѓу другото, спортски стипендии, субвенционирање за покриви и фасади, парична помош за пензионерите, како и финансиски средства за помош на социјално-загрозени семејства.

Во овој буџет се предвидени нула средства за репрезентација, за патни трошоци, како и за непродуктивни трошоци. Парите на граѓаните ќе се користат исклучиво за нивни потреби. 2025 година ќе биде година на развој, на многу нови значајни проекти во сите населени места – велат од Бутел.

Општина Ѓорче Петров се пофали дека е усвоен рекорден буџет „тежок“ една милијарда денари, од нив 332 за капитални расходи. Наредната година ќе се градат три градинки, и тоа во Стопански Двор, Дексион, во населбата Александрија, а за четвртата што се планира во населбата Ново Село, ќе се работи проект. Целта е, како што велат од Ѓорче Петров, да нема повеќе листи на чекање за прием на деца во градинка.

Со новиот буџет се предвидени 80 милиони денари за изградба и реконструкција на улици и патишта, 7,2 милиони денари за позелена и почиста општина, ќе се вложува во поддршка на учениците и на семејствата, ќе има и по 7000 денари за секое новороденче, а предвидени се и субвенции за набавка на клима-уреди и топлотни пумпи и за набавка на велосипеди.

Низа инвестиции и поволности за жителите се најавуваат и со усвоениот буџет на Кисела Вода.

 Фокусот на буџетот се капиталните инвестиции, за кои се издвоени рекордни 447,7 милиони денари во основниот и 471 милион денари во консолидираниот буџет. Средствата ќе бидат наменети за приоритетни области, какви што се патна инфраструктура и подземни решенија, урбана опрема и реконструкција на салата „Расадник“, изградба и доградба на училишта и градинки, инвестиции во животната средина. Дополнително, се предвидуваат рекордни субвенции и финансиска помош од 52 милиони денари за граѓаните, како и нови субвенции за пензионери и матуранти – вели градоначалникот Орце Ѓорѓиевски.

Неодамна е усвоен и буџетот на Општина Чаир за 2025 година. Преку овој буџет, според градоначалникот Висар Ганиу, целта е да се подобри инфраструктурата, да се зголеми квалитетот на јавните услуги и да се поддржат клучни сектори какви што се образованието, здравството и социјалната благосостојба.

Цел список проекти наведува и градоначалникот на Гази Баба, Бобан Стефковски, кој тврди дека наредната година следува брз развој на општината. Граѓаните можат да очекуваат изградба на градинки во Инџиково и во Трубарево, асфалтирање на повеќе од 40 локални улици, фекална канализација во дел од Трубарево и Јурумлери и други проекти. Предвидени се голем број субвенции за жителите како, на пример, за реконструкција на лифтови и за покриви, но и за набавка на инвертер-клими, за велосипеди, за печки на пелети, за вградување сончеви колектори, како и за уреди за течен гас во возилата, потоа субвенции за чистење оџаци, за талентирани ученици, ученици спортисти и ученици со посебни образовни потреби. Ќе продолжат и субвенциите за стерилизација на миленици, а меѓу другото ќе има и финансиска поддршка за секое новороденче и прваче.

Проектираниот основен буџет во Општина Центар е рекорден, со вкупна сума од повеќе од една милијарда денари, од кои 45 отсто се наменети за капитални проекти, додека преостанатите 55 отсто ќе се користат за тековно и оперативно функционирање на општината.

Буџетот за наредната година е развоен, реален и транспарентен, а приоритетните капитални проекти се: финализирање на реконструкцијата на спортската сала „Работнички“, изградба на нова општинска зграда со подземен паркинг, реконструкција на улиците во локалитетот Тасино Чешмиче, во населбата Капиштец и во реонот на Дебар Маало, реконструкција на улицата 50. Дивизија, пренамена на улицата Мирослав Крлежа во пешачка зона и модернизација на јавното осветлување со воведување ЛЕД-технологија и примена на современи техники за управување и надзор – информираат од Центар.

Оттаму додаваат дека се обезбедени средства за реконструкција на училиштата, набавка на униформи за учениците, за инсталирање фотоволтаични системи на три детски градинки, ќе се набавуваат и мерни сензори за бучава, а планирани се средства и за санација и поставување урбана опрема, реконструкција на игралишта, паркови и зелени површини. Обезбедени се средства и за проектот „итно копче“ за помош во итни ситуации за повозрасни лица и пакет услуги за деца и жени жртви на насилство, како и превенција од дроги и зависности.

Износот на основниот буџет на Општина Карпош за 2025 гофина е околу 803 милиони денари, а консолидираниот 1,5 милијарда денари. И во оваа општина ќе се градат и ќе се реконструираат улици, ќе се обновуваат училишта и детски градинки. Во наредната година ќе продолжи субвенционирањето за обука за полагање за возачка дозвола за младите карпошани, ќе има стипендии за талентирани ученици, ужинки и бесплатни екскурзии на основците, како и за реконструкција на покриви, лифтови и фасади, а ќе се вложува и во спортски манифестации.

Општина Карпош ќе вложи повеќе од милион денари за доопремување на спортската сала „Партизан“ во Карпош 4 со потребните спортски реквизити.

Како што информираат од Карпош, во Програмата од областа на информатичката технологија за 2025 година, обезбедени се средства и за набавка на радари што ќе ја мерат брзината на движење на возилата што минуваат покрај сите основни училишта и детски градинки, за ИТ-едукација, за набавка на хардвер и хардверски компоненти и за други проекти.