Министерот за правда од техничката влада Кренар Лога пратил писма до меѓународната заедница против намерата на ВМРО-ДПМНЕ да ги распушти Судскиот совет и Советот на јавни обвинители. Лога, кој лани цело лето самиот лично се ангажираше да го распушти Судскиот совет поради скандалите во ова тело, сега плановите на идната власт за реформи во судскиот систем, меѓу кои е и распуштање на двата совета, ги нарекува упад во правосудството.
Министерот Лога, кој е дел од Владата во заминување која има технички мандат да врши само основни тековни работи без целосен уставен капацитет и овластувања затоа што веќе е конституирано новото Собрание, пратил службени писма до Делегацијата на ЕУ во Македонија, до амбасадите на САД, Германија, Франција, Холандија и Белгија, до мисијата на ОБСЕ во Скопје, до Програмската канцеларија на Советот на Европа, до Стејт департментот и до Европската комисија во Брисел, во кои изразува сериозна загриженост и вознемиреност.

Министерот е „особено загрижен“

– Паралелно со најавите за реформа на органите на управата и реорганизација на министерствата, владејачкото мнозинство соопшти дека подготвува и пакет закони со кои ќе се распуштат двете уставни и независни категории – Судскиот совет и Советот на јавните обвинители. Изјавите од партиски функционери, за мене лично и за Министерството за правда, се неприфатливи и недозволиви, не заради одбрана на поединци во овие органи, туку за независноста и непристрасноста на овие институции за кои имаме добиено извештај од Оценската мисија, каде што точно е наведено што треба да се преземе за подобрување на состојбите во судството – наведува Лога во писмото.

Во дописот тој признава дека лани барал да се распушти Судскиот совет, но не добил поддршка од коалициските партнери и од опозицијата.

– По одржани консултации со ваши претставници, ми беше сугерирано дека Оценската мисија ќе ја скенира состојбата во Судскиот совет и ќе даде препораки. Препораките со особено внимание беа разгледани и беше формирана работна група за законски реформи на Судскиот совет, каде што во повеќе наврати беа поканети претставници на тогашната опозициска партија и сегашен носител на владејачкото мнозинство, ВМРО-ДПМНЕ, но не добивме одговор. Изразуваме сериозна загриженост што поставеноста на ваквата концентрација на моќ на трите власти кај една политичка партија ќе значи пресликување на состојбите и проблемите пред 2017 година, што неспорно создадоа заробена држава, констатирано во повеќебројни извештаи од меѓународните организации – пишува Лога.

Ваквите најави се избрзани и опасни, додава тој на крајот на писмото, кое го завршува со зборовите „особено загрижен, министер за правда Кренар Лога“.

ВМРО-ДПМНЕ: Ќе има одговорност за упадите во законите

Од партијата ВМРО-ДПМНЕ во врска со ставот на Лога дека планираат „упад во правосудството“, порачаа дека ќе има одговорност за сите упади во законите.

– Почитувани, оценката за правото во Македонија со Лога, со СДС и со ДУИ е добро позната и во Македонија и во меѓународната заедница. Кренар Лога, заедно со СДС и со ДУИ, се во опозиција. Доаѓа време за одговорност, за сите упади во законите во правниот и во судскиот систем – одговори денеска портпаролот Наум Стоилковски прашан за партиски став за писмата на Лога.

Во својата предизборна програма, освен за реформа на Судскиот совет и на Советот на јавни обвинители, ВМРО-ДПМНЕ најави и сосема нова законска рамка за правосудството, односно нов Кривичен законик, закон за јавно обвинителство, закон за судови, закон за Судски совет, закон за кривична постапка, закон за Совет на јавни обвинители итн.
Во програмата се наведува дека има акумулирани системски девијации што ги направиле Судскиот совет и судиите ранливи на надворешни влијанија и заплашувања, па затоа сегашниот состав на Советот ќе биде распуштен, затоа што го изгубил кредибилитетот.

– Со законски измени ќе утврдиме строги и објективно мерливи критериуми што треба да ги исполнат новите членови на Судскиот совет, избрани на предлог на Собранието и на Претседателот на државата. Постапката ќе биде транспарентна и јавна, со што ќе се гарантира интегритетот и квалитетот на избраните кандидати. Од кандидатите ќе се бара да имаат програма за работа со точно утврдени индикатори за успешност. Ќе утврдиме јасно дефинирана постапка за избор и разрешување на претседателот на Судскиот совет, задолжително образложение на донесените одлуки, како и зголемена транспарентност во одлучувањето. При реформата на Судскиот совет ќе ги земеме предвид сите препораки од ЕУ и добрите практики на Европската мрежа на Судски совети – наведува ВМРО-ДПМНЕ во програмата.

МН: Милошоски: Лога нека се жали каде сака

Пратеникот Антонио Милошоски за писмата на Лога рече дека тој  има право да се жали ако сака да пишува такви писма, но му порача да не ги испраќа преку Македонска пошта, како што рече, јавното претпријатие што 20 години го управува ДУИ и е нефункционално, па може да не стигнат до адресите на кои што сака да се пожали.

– Но, по однос на темата Републички судски совет и Совет за јавни обвинители, токму заради најнеспособниот тандем досега во Министерството за правда, министерот Лога и заменичката министерка Викторија Аврамовска Мадиќ, падна довербата во правосудство и во овие две институции на рекордно ниски два проценти. Реформи се неопходни и во двете овие институции – рече Милошоски во гостување на ТВ21.

Според него, ВМРО-ДПМНЕ и коалицијата имаат обврска да ја направат реформата затоа што ја ветиле пред граѓаните и добиле голема поддршка. Додаде и дека законските интервенции ќе бидат сублимат на експертски мислења и препораки на домашната стручна јавност.

За овие најави на ВМРО-ДПМНЕ неодамна побаравме став од самиот Судски совет, од каде што укажаа дека судската власт како една од трите власти, е самостојна и независна, а секое мешање од носителите на другите две власти носи сериозна опасност за демократското општество, правната сигурност и владеењето на правото.

– Свесни сме за состојбите, за нивото на доверба и критиките ги прифаќаме. Но, убедени сме дека судството има капацитет да ги надмине состојбите без реформи и резови за кои никој не може однапред да ги предвиди ефектите кои ќе бидат предизвикани. Реформи заради реформи никому не му се потребни. Само тогаш кога политичарите кои доаѓаат и си заминуваат од власт, ќе сфатат дека судската власт е столбот кој останува и не е марионета, ниту инструмент за остварување на нечии интереси, граѓаните ќе добијат судство какво што заслужуваат – порачаа неодамна од Судскиот совет.

Судскиот совет е во центарот на вниманието од минатата пролет кога на незаконски начин беше сменета претседателката Весна Дамева, која потоа го тужеше Советот пред Управниот суд, го доби случајот и се врати на претседателската функција. Поради скандалот, министерот Лога побара со законски измени веднаш да се распушти Судскиот совет. Двајца судии Зоран Герасимовски и Мирјана Радевска-Стефкова тогаш си поднесоа оставки од функциите членови на Судскиот совет, а граѓанските организации побараа оставки да си поднесат сите членови.

По скандалот излезе и анкетата на ОБСЕ за ризиците од корупција во судството, во која, поразително, 72 отсто од судиите одговориле дека Судскиот совет не ја штити успешно независноста на судството, а значителен дел од судиите, 62 отсто, не го смета Судскиот совет како орган што е независен во своето работење.