Политичката партија „Десна“ чиј претседател беше Љупчо Палевски – Палчо, првоосомничен за убиството и грабнувањето на младата Вања Ѓорчевска и на 74-годишниот Панче Жежовски, објави писмо кое наводно Палевски го напишал од затворот во Турција, а во кое е упатено директно обвинување до министерот за правда Кренар Лога дека наводно правел калкулации и застој со екстрадицијата поради изборите во земјава.

Според објавата на „Десна“, писмото лично го пишувал Палевски на 29 април а на 30 април му било испратено на Лога на службениот мејл.

Аргументот дека извршувате партиски политички наредби, а не спроведување на законски обврски е тоа што на 5 декември и на сослушувањето на 23 декември одбрав брза постапка за моја екстрадиција со моја согласност, на слободна волја без противење. Судот во Баликесир во три недели ја заврши целата постапка а од 17 јануари годинава предметот се наоѓа на маса кај вашиот колега министер за правда на Турција, стои во писмото од кое се објавени и копии напишани во ракопис.

Во писмото се додава дека од 7 декември 2023 година до денеска се поминати пет месеци.

Поминати се пет месеци а вие како министер не сте направиле ништо за да бидам изведен пред органите на прогонот, пред Основното јавно обвинителство за да можам активно да се бранам. Тоа е моето неприкосновено право произлезено од закон. Партиското барање и задача од вашиот коалициски партнер да ме држите подалеку од Македонија за време на изборите, најблаго кажано е европско „прогресивно“ лицемерие но и кршење на Закон и на моите елементарни човекови права, пишува во писмото атрибуирано на Палевски.

Инаку Министерството за правда пред два дена соопшти дека е добиено официјално известување дека екстрадицијата на Љупчо Палевски е дозволена. Палевски е осомничен за две кривични дела „грабнување“ и „убиство на свиреп начин“ на Вања Ѓорчевска и Панче Жежовски.

Од Министерството за правда посочуваат дека е завршен судскиот процес и административната процедура и сега останува само да се реализира трансферот.