Фудбалерите на Силекс оваа натпреварувачка сезона во Првата македонска лига го освоија второто место со 67 бодови, три помалку од шампионот Шкендија.

Клубот од Кратово, заедно со Вардар и Работнички, ќе ја претставуваат нашата земја ова лето во квалификациите за Конференциската лига.

ФК Силекс веќе размислува за иднината, денеска ја информираше јавноста дека е продолжена соработката со двајцата играчи, браќата Љупче и Ѓорѓе Џеков.

Љупче и Ѓорѓе Џеков официјално ставија потпис на четиригодишен професионален договор со клубот, односно ќе останат верни до 2029 година.

Браќата Џеков се членови на Силекс веќе една ипол година, во тој период Љупче застана меѓу стативите на 34 натпревари во Прва МФЛ, додека Ѓорѓе на теренот беше на 27 натпревари.

Претходно ФК Силекс ангажираше ново засилување, станува збор за 28-годишниот португалски интернационалец Мигуел Пиреш кој настапува во среднито ред и доаѓа од редовите на ФК Дигенис Акритас Морфу од Кипар.