Триесет дена притвор му одреди судија на претходна постапка на 28-годишниот Мерван Љоки од скопската населба Чаир, кој од Јавното обвинителство беше осомничен за саботниот инцидент во кој сега осомничениот прво удрил полициски началник, а потоа сакал да му впери пиштол во глава, испукал куршум во воздух и избегал.

Според МВР, Љоки уште вечерта сам се пријавил во полициска станица, а подоцна од ОЈО е обвинет за кривични дела неовластено изработување, држење, посредување и тргување со оружје или распрскувачки материи и за напад врз службено лице при вршење работи на безбедноста.

Додека осомничениот е во притвор, полицијата и ОЈО продолжуваат со истрагата за инцидентот. Засега се знае дека Мерван, на 23 мај (во саботата), во вечерните часови пред угостителски објект „Галакси“ лоциран на улицата „Македонско-косовска бригада“ во Чаир, го нападнал и повредил полицискиот началникот на ЕВР-Чаир, Едмунд Муртезани кој критичната вечер вршел контрола на работата на помладите колеги кои постапувале во кампањата „Безбедна матурска прослава“.

Полициски тим од ЕВР Чаир во кој бил и началникот на оваа единица на МВР сопреле возило затоа што имал „флешери“, ротациони светла кои биле поставени на автомобил „мицубиши“. Ова возило го управувал токму Љоки. Тој се претставил дека работи за заменик-директорот на БЈБ при МВР, Ариф Асани. Додека траела расправата помеѓу Љоки и Муртезани близу нив почнале да се собираат гости од ресторанот „Галакси“ каде имало семејна прослава, а меѓу гостите имало и полициски функционери.

Дознаваме дека пристигнала група од најмалку шест лица кои наводно во име на Асани барале од Муртезани задржаниот Љоки да биде пуштен, но началникот го одбил барањето. Тогаш Мерван извадил пиштол по што истрелал еден куршум во воздух. По истрелот тој е совладан, но сепак успеал да избега од местото на инцидентот. Една од верзиите е дека заменик директорот Асани наредил да биде пуштен пиштолџијата. Втората верзија е дека групата на уапсениот почнала да ги влече полицајците по што осомничениот успеал да избега.

Токму за овој опасен настан ОЈО тврди дека сега осомничениот најпрвин вербално му се заканил на полицискиот службеник, а потоа и физички го нападнал, удирајќи го со бокс во пределот на раката.

„Осомничениот извадил и огнено оружје – пиштол марка „Сиг Сауер“ со 10 куршуми во рамката, кој го поседувал без дозвола, го репетирал и го вперил кон оштетениот. Еден од другите присутни полициски службеници му ја оттурнал раката, при што осомничениот испукал еден проектил во воздух, а веднаш потоа бил совладан од присутните полицајци“, соопшти државното Јавно обвинителство.

Во истрага одземени се и безбедносни снимки од блискиот угостителски објект и снимки од камерите на Сејф-сити. За потсетување, Ариф Асани е заменик-директор на Бирото за јавна безбедност во МВР, а претходно беше заменик директор во УБК, а беше и на функцијата заменик директор на Агенцијата за национална безбедност. Мерка притвор за Мерван Љоки ја побарало ОЈО бидејќи оцениле дека осомничениот може да избега, да влијае врз сведоците или да го повтори делото.