Партијата Беса ќе гласа против вклучувањето на Бугарите во Уставот, доколку формулацијата „20%“ не се замени со „албански јазик“. Потпретседателот на партијата, Фатмир Лимани, во емисијата „200“ на Алсат, која ќе биде емитувана вечерва, вели дека Беса не е против вклучување на Бугарите во уставот, но инсистираат да се прифати нивниот амандман.

„Ние не сме против вклучување на Бугарите во Уставот. Ние не сме против вклучувањето на секоја заедница во Уставот. Но ние сме против тоа Албанците да се претстават како 20%. Албанците со преамбулата договорена со Охридскиот договор се државотворен народ. И во случај да не се избрише 20% како дефиниција внатре во Уставот, Беса ќе гласа против“, вели Лимани, додавајќи дека ова не било условување од партијата.

Лимани рече дека Беса не условува, затоа што „сите партии се согласни да се брише „20 отсто“ од Уставот“. Според него, претседателот на ВМРО Христијан Мицкоски не е против бришење на оваа одредница и нејзина замена со „албански јазик“.

„Ние не условуваме. За да условуваме, треба да има страна која не се согласува. ВМРО отворено кажа дека нема проблем да се брише 20%. Претседателот на државата пред некој ден изјави дека тоа не е проблем. Тоа не е условување. Тоа е легитимно право, дури тоа е гарантирано и со потпишувањето на договорот од Охрид. Тоа не е условување. Ние како Беса имаме поднесено амандман во Владата која потоа ќе го достави во Собрание тоа барање за уставни измени“, додава Лимани.

Тој рече и дека Беса нема да учествува во работната група за уставните измени.