Македонската ликовна уметница Касиопеја Наумоска на 10 март одбележа три децении професионално ликовно творештво во и надвор од Македонија. Нејзината самостојна изложба со наслов „Првите 30 години“ е поставена во галеријата на Кинотека на РСМ.

– На изложбата се претставени 42 дела, најмногу изработени во последниве три години. Распонот на годините од создадените слики е од 1996, неколку потоа, па сѐ до 2023 година. Гледајќи според просторот на галеријата немаше можност, а ни потреба да се изложат дела со монументална димензија. Оваа изложба многу ми значи како лично заокружување на тридецениското творештво, сосема доволно да се одбележи – објасни авторката.

Емотивни и многу искрени зборови за творештвото и личноста на Касиопеја Наумоска напишаа отец Пимен и д-р Васко Шутаров. „Уметноста е единствената сериозна работа на овој свет. А уметникот е единствената личност што никогаш не е сериозна… Целта на уметноста е да ја открие уметноста и да го скрие уметникот… Уметноста ни овозможува да се изгубиме и да се пронајдеме себеси, во исто време… Можеш да гледаш во некоја слика цела недела и потоа никогаш да не помислиш на неа. Можеш и само за миг да погледнеш во некоја слика и потоа цел живот да мислиш на неа… Уметностa е линијата околу твоите мисли… Да се биде уметник, значи да се верува во животот… Уметничкото дело е врeскот на слободата… Секое дете е уметник, проблемот е само дали ќе остане уметник кога ќе порасне! Во уметноста, како и во љубовта, доволен е инстинктот… Да фрлиш светлина во срцeтo, тоа е повикот на уметноста… Силни причини создаваат силни дела! Уметноста никогаш не е завршена, само за момент е напуштена… Одличниот уметник е најголемото благо на една нација“, телеграфски забележува Васко Шутаров.

– Почестени сме што сме современици на Касиопеја, која несомнено е дел од ѕвезденото јато прекрасни, талентирани и креативни сликари што Македонија ги дала – напиша отец Пимен.

(Текстот е објавен во „Културен печат“ број 170, во печатеното издание на весникот „Слободен печат“ на 11-12.3.2023)