Креирана како интерактивен проект, македонскиот ликовен уметник Дарко Аницин ја подготви изложбата „Предоживувања низ музика“, која е поддржана од Министерството за култура како проект од национален интерес за 2020 година.

Изложбата содржи десет акрилни дела, именувани и создадени врз база на десет музички дела, кои ќе можат да се слушнат во галеријата на отворањето на 25 август, во 19 часот, во Домот на културата „Кочо Рацин“ во Скопје. Насловот на изложбата ја предодредува и нејзината тематика. Станува збор за „предоживувања“ на авторот во смисла на лични, моментални доживувања и импликации во однос на одредена емоција, чувство и справување со стресот.

– Интерактивната изложба/проект „Предоживувања низ музика“ има за цел да ги мобилизира граѓаните/ките и да ги поттикне да размислуваат како уметноста влијае на нивните состојби. Истовремено ја спојува ликовната уметност со музиката. Проектот се состои од мобилизирање на публиката преку интерактивен конкурс, каде граѓаните праќаат на јавен повик свои музички нумери кои им помагаат да се ослободат од стресот. Направив избор на музички дела по кои создадов десет акрилни дела со кои ќе се претставам на оваа изложба, каде ќе може да се слушаат песните избрани од јавниот повик и да се гледаат создадените дела – открива Аницин.

Претходно тој се претстави со изложба во КИЦ, која имаше сосема различен концепт.

– Изложбата во КИЦ беше насловена „Црно – шарено“ на која се претставив со 25 цртежи, работени во акрил на хартија. Таа претставуваше повеќесмислена релација на „вистински“ живот и „отсликан“ живот, борба на „лошото“ и „доброто“, на црно-белото размислување, живеење и она другото. „Црно-шарено“ беше соочување на самиот со себе – објаснува авторот.

Графичкиот израз е специфика на креативната работа на Аницин. Најчесто за неговите цртежи се вели дека се наметнува впечаток дека станува збор за отпечатени графички листови.

– Таквиот впечаток е сосема логичен, ако се земе предвид дека по вокација сум графичар со графички дизајн. Согласно моменталната инспирација и потребата за изразување ја одредувам техниката на работа за одредено дело. Но, кога станува збор за проект или циклус на дела, тогаш однапред знам каква техника ќе употребам, како што е случај со оваа изложба. Затоа би сакал да ја поканам публиката да дојде на отворањето и заедно да ја почувствуваме синергијата помеѓу музичката и ликовната уметност – посочи ликовниот уметник Дарко Аницин.

(Текстот е објавен во „Културен печат“ број 45, во печатеното издание на „Слободен печат“ на 22-23 август 2020)