Додека на просторот на поранешниот „Бриколаж“ веќе се гради маркет на „Лидл“, како што дознаваме, компанијата ќе отвора маркет и во Реонски центар во општина Аеродром.

Парцелата со површина од 3265 метри квадратни, која со години беше имот на домашна градежна компанија, веќе е во сопственост на „Лидл“, а од Општина Аеродром потврдуваат дека е издадено и одобрение за градење.

На посочената локација „Лидл“ ќе гради маркет, прв од ваков вид во Македонија. Приземјето ќе биде за паркирање, а на катот ќе биде сместен маркетот, за што веќе е издадена градежна дозвола, велат од Аеродром.

Станува збор за парцела која е лоцирана покрај булеварот „Видое Смилевски Бато“, веднаш до маркетите на „Кам“ и „Стокомак“. Според јавно достапните податоци на Агенцијата за катастар парцелата  1734/54 е градежно неизградено земјиште во сопственост на Друштвото за трговија на големо и мало „Лидл Северна Македонија“ ДООЕЛ Скопје.

Граѓаните кои живеат во околината на двата постоечки маркети, каде треба да се изгради и новиот, се загрижени дека поради ова во иднина ќе се зголеми сообраќајниот хаос во овој дел и наоѓањето на слободно место за паркирање ќе стане речиси невозможно.

Прашањето што ние како граѓани сакаме да го упатиме до Општина Аеродром, е какво ќе биде сообраќајното решение за пристапот со возила до овој објект, бидејќи паркирањето, метежот кој го имаат граѓаните од постоечките маркети, дивите продавачи и хаварисаните и тешките товарни возила кои се паркираат на јавните паркиралишта се веќе проблеми кои со години се нерешени од локалната власт – се жалат граѓаните на фејсбук групата „Ново Лисиче“.

За пристапот до маркетот со возила изготвено е сообраќајно решение, без кое не може да се издаде ниту дозвола за градба.

Сообраќајното решение предвидува пристап до објектот од сервисната улица која е паралелна на булевар „Видое Смилевски Бато“ – кусо одговараат од Аеродром.

Отворањето на „Лидл“ во Скопје повеќето граѓани со нетрпение го очекуваат. Дали објектот во Реонски центар ќе создаде сообраќаен метерж и уште поголем проблем со паркирањето ќе се види откако маркетот ќе се изгради и пушти во употреба.

Лидл го купи објектот „Бриколаж“ од „Скопски пазар“

Дотогаш во овој дел веќе треба да биде воведено зонско паркирање, кое Општина Аеродром неколкупати го најави, но сега на прашањето кога тоа ќе се случи оттаму велат дека „Општината не управува со зонското паркирање“ и не даваат конкретен одговор, иако повеќе од јасно е дека ЈП „Градски паркинг“ кој ќе го регулира зонското, воведувањето го прави во координација со Општината.

Што се однесува до маркетите на „Лидл“ во Скопје да потсетиме дека минатата година во јуни компанијата за 9,5 милиони евра го купи објектот каде што дотогаш беше сместен продажниот салон на „Бриколаж“ во скопската општина Гази Баба.

Во јануари 2024 година „Лидл“ започна со изградба на логистички и дистрибутивен центар во индустриската зона Речица, во близина на Куманово, кој треба да отвори нови 150 работни места, додека пак продавниците на „Лидл“ требаше да започнат со работа во 2025 година. Досега не е отворен ниту еден маркет.