Либанската армија целосно ќе ја разоружа милитантната група Хезболах во близина на границата со Израел во рок од три месеци, изјави денес либанскиот министер за надворешни работи Јусеф Раги.

Раги изјави дека шефот на либанската армија, Родолф Хејкал, минатата недела ѝ претставил на владата на земјата план од пет фази за спроведување политика што ја позиционира либанската држава како единствена што легитимно може да носи оружје, објави „Тајмс оф Израел“.

Според него, првата фаза треба да трае „три месеци… во текот на кои отстранувањето на оружјето ќе биде завршено јужно од реката Литани“, во ноември.

Со години, Израел бараше активностите на Хезболах, поддржани од Иран, да бидат забранети јужно од реката Литани, која на многу места тече околу 25 километри од израелската граница.