Либан во недела ќе претстави план со цел да го убеди Хезболах да се разоружа, а се очекува Израел да поднесе соодветна рамка за своето воено повлекување, изјави денеска високиот американски претставник Томас Барак.

Зборувајќи по разговорите со претседателот Џозеф Аун во Бејрут, Барак рече дека либанскиот предлог нема да вклучува воена принуда, туку ќе се фокусира на напорите за охрабрување на Хезболах да го предаде оружјето – вклучително и решавање на економското влијание врз борците финансирани од Иран .

„Либанската армија и влада не зборуваат за војна. Тие зборуваат за тоа како да го убедат Хезболах да се откаже од тоа оружје“, рече Барак.

Потегот овој месец од страна на либанскиот кабинет да ја задолжи армијата да изготви план за воспоставување државен монопол врз оружјето го налути силно вооружениот Хезболах , кој вели дека ваквите повици му служат само на Израел.

Израел во понеделник сигнализираше дека ќе го намали своето воено присуство во јужен Либан доколку либанските вооружени сили преземат акција за разоружување на шиитската милитантна група поддржана од Иран.

Барак, кој се сретна со израелскиот премиер Бенјамин Нетанјаху во неделата, го опиша тој развој на настаните како „историски“.

„Она што Израел сега го кажа е: ние не сакаме да го окупираме Либан. Со задоволство ќе се повлечеме од Либан и ќе ги исполниме тие очекувања за повлекување со нашиот план штом ќе видиме каков е планот за вистинско разоружување на Хезболах“, рече тој.

Либанскиот премиер Наваф Салам, по средбата со американската делегација, изјави дека Либан тргнал по неповратен пат за ставање на целото оружје под државна контрола, а армијата треба да презентира сеопфатен план до следната недела.

Лидерот на Хезболах, Наим Касем, во снимен говор емитуван во понеделник, ја критикуваше одлуката на владата да ја разоружа групата и ги повика официјалните лица да ја поништат, велејќи дека повлекувањето „би било доблест“.

Иако не се разменети формални предлози, Барак рече дека усните ветувања од двете страни укажуваат на тесен пат кон имплементација.