Левица: Црвената фаза бара задолжителни мерки, а не препораки
Левица ги повика надлежните институции веднаш да донесат задолжителни мерки поради високите температури кои деновиве надминуваат 40 степени. Од партијата велат дека согласно Акцискиот план на Институтот за јавно здравје (2025–2030), при надминување на граничните вредности на температурите од 39°C во јули (за скопскиот регион), се активира црвена фаза – состојба која бара итни и засилени мерки за заштита на населението.
Препорачано
Според Левица, несериозно и крајно неодговорно е институциите да излегуваат со неефикасни, незадолжителни препораки, наместо со обврзувачки мерки кои би ги заштитиле граѓаните, особено најранливите категории.
„Министерството за здравство и Владата ја минимизираат реалната закана по животот и здравјето на граѓаните, додека медицинските служби и Брзата помош се веќе преоптоварени. Дополнително, давање препораки до приватните работодавачи во контекст на македонските услови, каде работничките права се грубо прекршувани, е недоволно и апсолутно неефективно“ нагласуваат од партијата.
Левица бара итна и конкретна акција од министерот за здравство Азир Алиу и Владата:
– Да се донесат задолжителни мерки за ослободување од работни обврски на ранливите категории, лица над 60 години, хронично болните од кардио-васкуларни и респираторни заболувања, онколошките пациенти, лицата со дијабет, трудниците и сл. неселективно, односно независно од секторот, работата која ја обавуваат;
– Да се забрани работа на отворено во критичните часови (11:00 – 17:00);
– Да се активираат сите мерки од постоечкиот акциски план на ИЈЗ;
– Да се ангажираат и мобилизираат локалните самоуправи и Црвениот крст за згрижување на бездомници и обезбедување на јавни простори за ладење;
– Да се засилат контролните механизми и да се санкционираат работодавците кои ги игнорираат мерките.
„Ниту еден човечки живот не смее да биде ставен на коцка поради нечија неспособност, незаинтересираност или бирократска летаргија. Неодговорноста на институциите во ваква состојба е повеќе од пропуст – таа е опасна и потенцијално кобна. Бараме веднаш да се прекине со игнорирањето на реалноста и да се преземат сите неопходни мерки за заштита на граѓаните“ порачаа од Левица.
Според најавите од УХМР, неподносливите жештини ќе се задржат до сабота, поради што Владата на предлог на Министерството за здравство усвои дополнителни препораки за заштита на граѓаните.
Од жештините ќе немаме дерман до сабота, ИЈЗ објави дополнителни препораки
