Претседателот на англискиот фудбалски клуб Тотенхем, Даниел Леви, ја истакна потребата од „разумен“ и „одржлив“ пристап кон трансфер политиката на клубот. Оваа изјава е дадена во врска со објавените финансиски резултати за изминатата година.

Иако клубот пријави загуба од 26,2 милиони фунти, ситуацијата е значително подобрена во однос на претходниот период кога дефицитот изнесуваше 86,8 милиони.

Фановите на Тотенхем продолжуваат да изразуваат незадоволство од раководството на Леви и сопствениците од Еник, а главните обвинувања се поврзани со недоволното вложување во тимот.

Настапот на тимот оваа сезона само го засили разочарувањето – Тотенхем е на незадоволителното 14 место во Премиер лигата, а последна вистинска можност за освојување трофеј останува учеството во Лига Европа.

– Не можеме да трошиме пари што ги немаме и нема да ја компромитираме финансиската стабилност на клубот. Привлекувањето играчи останува клучен елемент, но мораме да се погрижиме да правиме паметни купувања во рамките на нашите финансиски можности – рече Леви.