Уставниот суд укина два члена од Деловникот за работа на Советот на јавни обвинители кои ги оспори обвинителката Ленче Ристоска, а кои предвидуваа можност во унапредувањето на обвинителите да се цени и како позитивна обвинителска дејност работењето на членовите на Советот на јавни обвинители.

Ристоска ги оспори членовите 4 и 7 од Деловникот кои предвидуваат членовите на Советот автоматски да бидат позитивно оценети додека им трае мандатот во Советот, односно како да ја вршат функцијата јавни обвинители.

– Во законот се подвлечени јасно кои услови треба да ги исполнуваат обвинителите кога бараат нивно унапредување. На тој начин и со тие одредби Советот на ЈО за себе воспоставил право, членовите обвинители додека работат во Советот да ги третираат како обвинители, а тие не се обвинители, а нивното работење во Советот да се третира како обвинителска дејност, што е апсурд. Ваквите одредби се во директна спротивност со Законот за јавното обвинителство и се разбира со самиот Устав, како највисок правен акт – изјави Осман Кадриу, судија известител за овој предмет.

Обвинителката пред Уставен го оспори оценувањето на членовите на Советот на јавни обвинители откако поранешниот претседател и член на Советот на јавни обвинители, Антонио Јолевски по завршувањето на неговиот мандат беше унапреден во Вишото јавно обвинителство, без оценување, а беше најгласен дека обвинителката Ленче Ристоска не може да напредува во Вишото обвинителство бидејќи била на трудничко отсуство.

Јолевски во октомври минатата година наместо да се врати во Основното јавно обвинителство Битола, тој откако му заврши мандатот како претседател и член на Советот е унапреден во Вишото јавно обвинителство Битола.

Тој кај Ристоска виде недостаток на работа по различни предмети, не напредувала во работата, но бараше тој да биде унапреден од основното во Вишото обвинителство Битола и за него ќе важат одредби од Законот за јавно обвинителство и Деловникот за работа на Советот на јавни обвинители, според кои, тој автоматски ќе биде позитивно оценет, иако во годините додека бил член на Советот на јавни обвинители не работел на судски предмети.

Ристоска го спори унапредувањето на членовите на Обвинителскиот совет откако Јолевски напредуваше без оценување