Возачот на Ферари, Шарл Леклер денеска дојде до третата победа сезонава и тоа на трката за Големата награда на Австрија што се возеше на „Ред Бул ринг“.

Леклер победи со две секунди предност пред возачот на Ред Бул, Макс Ферстапен иако во последните шест круга имаше проблеми со педалата за гас.

– Ова беше добра трка за нас, имавме добар ритам. На почетокот се борев со Макс, а финишот на трката беше неверојатно тежок. Имав проблеми, педалата се заглави на 20 или 30 отсто при мали брзини. Проблемот што го имав беше речиси ист со тој што го имаше Саинс кој мораше предвреме да ја заврши трката. Но, успеавме да издржиме до крај  – изјави Леклер.

Со победата, Леклер ја намали предноста на Ферстапен во генералниот пласман на 38 поени, возачот на Ред Бул има 208 бода, додека денешниот победник сега има 170 бода.

– Дефинитивно ми беше потребна оваа победа. Последните пет трки беа неверојатно тешки за мене и за екипата. Одлично е чувството конечно да покажеме дека имаме ритам и дека можеме да победиме. Мора да се бориме до крај – рече Леклер.

Следната трка ќе се вози на 24 јули за Големата награда на Франција.