„Лекип“: УЕФА нуди решение за ЛШ, Македонија и Косово ќе играат во јули?!
Пандемијата на коронавирусот прекина или откажа голем број на спортски натпреварувања низ светот, но и покрај големиот притисок и противењето на многу екипи и фудбалери, вчера се одиграни шест натпревари од осминафиналето од Лигата на Европа.
Секојдневно низ Европа се прекинуваат фудбалските првенства поради пандемијата со коронавирусот, а неизбежна тема на медиумите е и можноста за евентуално откажување на Европското првенство кое треба да се игра од 12 јуни до 12 јули.
Препорачано
Францускиот „Лекип“ од свои извори во УЕФА, дојде до нови сознанија за иднината на Лигата на шампионите но и за Евро 2020, но прашање е дали екипите и земјите членки на УЕФА се подготвени да ги прифатат решенијата.
Наредниот вторник ќе биде одржан состанок на сите земји членки на УЕФА за да се донесе одлука за иднината на домашните и европските натпреварувања.
„Лекип“ наведува дека УЕФА не сака да се откаже од Лигата на шампионите и пред претставниците на сите 55 земји членки, ќе им изнесе предлог завршницата во елитното натпреварување, но и во Лигата на Европа да се игра во скратен формат.
Претседателот на УЕФА, Александер Чеферин, наводно е со став нокаут фазата, од четвртфиналето да се игра само по еден натпревар, а со ждрепка би се одлучувал домаќинот, додека втората варијанта е натпреварите да се играат на неутрален терен.
УЕФА нуди уште едно решение, натпреварите од ЛШ сака да се играат во еден град – Истанбул, додека тие од Лигата на Европа да се играат во полскиот Гдањск, но се уште не се знае дали турските и полските власти дале зелено светло за овој предлог.
Францускиот весник пишува дека УЕФА ќе предложи сите домашни првенства да завршат до 30 јуни за по завршување на сезоната да се стартува со репрезентативните обврски, поточно одигрување на бараж натпреварите од Лигата на Нациите преку кои ќе бидат познати последните учесници на ЕП. Меѓу бараж средбите е и пресметката на Македонија и Косово, а доколку слават, „рисовите“ во финалето од Групата Д би ги очекувал дуел со подобриот од натпреварот Грузија – Белорусија.
„Лекип“ исто така тврди дека УЕФА инсистира на поделба на трошоците поради евентуалното откажување на Европското првенство за наредната година. Речиси сите земји членки на УЕФА бараат Евро 2020 да се одложи и поради европската куќа на фудбалот сака и поделба на трошоците кои се проценуваат на 200 до 300 милиони евра.
