Кинескиот актер и мајстор на боречки вештини Брус Ли не ја доживеал премиерата на своето ремек дело „Во змејското гнездо“ („Enter the Dragon“), која е случила на 26 јули 1973 година во Хонг Конг, Кина. Тој починал шест дена пред премиерата, на 20 јули, на 33-годишна возраст.

Официјалната причина за смртта била алергиска реакција предизвикана од мешавина на ТХЦ во неговото тело и аналгетик што му го дала актерката Бети Тинг Пеи бидејќи се пожалил на главоболка. Но, прераната смрт на Ли ги поттикна и теориите на заговор кои се обидуваа да ги обвинат кинеските тријади и италијанската мафија.

Сепак, најпопуларната теорија за неговата смрт е поврзана со неговата љубовница, за која многумина веруваат дека е убиецот.

Имено, на 20 јули 1973 година, Ли заспал откако се пожалил на главоболка и никогаш не се разбудил. Службата за итна помош била повикана откако бил пронајден во несвест, но Ли бил прогласен за мртов по пристигнувањето во болницата.

Што всушност се случило на кобниот ден? Брус му напишаl писмо на својот американски адвокат Адријан Маршал во врска со серија преговори и договори за нови проекти. Меѓу нив била и новата филмска понуда од „Ворнер Брос“ и предлогот на Хана-Барбера за анимирана серија базирана на неговиот живот.

Имало и предлози за книги, облека и слично. Откако го испратил писмото, се возел до студиото „Златна жетва“. Таму се сретнал со Џорџ Лазенби, австралискиот Џејмс Бонд, за да разговараат за неговото учество во филмот „Игри на смртта“. Им се придружил и Андре Морган. Ли го снимил најголемиот дел од крајот на тој филм, а неговата цел беше некако да го вклучи Лазенби во приказната. За ова разговарал и со Рејмонд Ков, кој им предложил да одат на вечера и да го официјализираат договорот. Но, Ли имал други планови – сакал да ја посети Бети Тинг Пеи бидејќи сакал „nooner“ (секс на ручек). Тој ветил дека ќе се врати попладне за да се договори колку пари да понуди Лазенби. Тој пристигнал кај Бети околу 13 часот и останал неколку часа.

Тие имале секс и зеле малку хашиш, но не и алкохол или други потешки дроги. Ли бил возбуден поради средбата со Џорџ Лазенби и за неговиот филм. Улогата ѝ ја понудил на Бети, која не ја прифатила. Таа вели дека не ѝ било удобно да глуми негова девојка во филмот, додека во реалниот живот била негова љубовница.

Околу 18.00 часот во нејзиниот стан пристигнал и Рејмонд Ков, иако не е сосема јасно зошто. Можеби затоа што цело попладне го чекале да се врати во студио, а кога тој не го сторил тоа, решиле да го побараат или можеби сакале да му помогнат да ја натера Бети да се согласи да го снима филмот. Тоа бил најтоплиот ден во месецот, пишува „Рингер“

„Брус не се чувствуваше баш добро, а ни јас не се чувствував добро. Испивме малку вода и тој почна да глуми. Секогаш беше многу активен и нурнат во улогата. Тоа го исцрпи, па се напи малку вода. И после тоа се чувствуваше некако збунето и слабо“, вели Ков.

Наскоро почнал да се жали на главоболка. Се приближувале до вечерата, а главоболката му се влошувала. Кога рекол дека би сакал да се одмори, Ков се обидел да замине.

„Рејмонд мислеше дека тоа е некаков изговор“, низ насмевка се присетува Бети.

Му дала апчиња, лекови против болки за кои вели дека ги пиел и претходно. Ли отишол во спалната соба да се одмори, а Бети слегла во дневната соба и гледала телевизија. Рејмонд заминал околу 19.45 часот, земајќи го Лазенби за да го однесе во јапонскиот ресторан во хотелот Мирамар. Откако го чекале некое време, ја повикале Бети која им рекла дека се уште спие и да почнат без него.

Кога се јавиле околу 21.30 часот, таа им рекла дека сè уште спие, но дека ќе се обиде да го разбуди. Таа влегла во собата, се обидела и воопшто не успеала. Таа хистерично му се јавила на Рејмонд и му рекла дека не може да го разбуди. Тој ѝ рекол да се смири и дека тој веднаш ќе се врати. Тој се присетил на 10 мај кога Ли за малку ќе умреше од церебрален едем. Затоа веднаш го повикал докторот кој му го спасил животот, доктор Ленгфорд. Но, неговата линија била зафатена.

Кога Ков пристигнал го затекнал Брус како лежи на стомак на креветот, а Бети која била до него, во состојба на целосен шок, се обидувала да го повика да се разбуди. Ков сфатил дека е предоцна и дека Ли веќе починал. Ситуацијата воопшто не била добра – познатиот актер лежел мртов на креветот на својата љубовница, а двајцата биле единствените сведоци. Тој размислувал за потенцијалниот скандал и за тоа како медиумите ќе го обвинат за неговата смрт. И тогаш решил да го спаси денот и дека најдобро би било Брус Ли да умре на друго место, а не во станот на својата љубовница.

Повторно го облекол и размислувал што може да направи, дали да го вози до неговиот стан, кој бил оддалечен само пет минути. Но, на крајот решил да донесе лекар. Тој ѝ рекол на Бети да се јави на нејзиниот личен лекар. Таа му се јавила, но не му го кажала името на дотичниот пациент. Кога пристигнал, Брус Ли веќе бил во коматозна состојба, без пулс и без знаци на живот. Десет минути безуспешно се обидувал да го оживее. Рејмонд му објаснил за каква тешка ситуација се работи, но докторот не го прифатил неговиот предлог да го однесе во болница, туку повикал Итна медицинска помош. Тој инсистирал на тоа дека се работи за колапс и да биде однесен во болницата „Кралица Елизабета“, а не во болницата каде што работел, бидејќи не му требало такво внимание.

Пред да дојде Итната медицинска помош, Ков ја презел контролата врз ситуацијата, како вистински продуцент. Тој ѝ рекол на Бети да не кажува ништо за медиумите, а потоа ѝ се јавил на сопругата и ѝ рекол дека Ли е на пат кон болница, со состојба слична на онаа во мај. Болничарите пристигнале за седум минути и не го препознале веднаш пациентот. Тие се обиделе да му го најдат пулсот, по што болничарот Панг Так Сун објаснил дека „иако лицето изгледало мртво, морало да ја примени целата прва помош“. Сопругата Линда пристигнала во болница 15 минути пред Итната медицинска помош.

„Никогаш не мислев дека може да умре или дека веќе е мртов“, се присетува таа.

Го закачиле на ЕКГ и се обиделе да го разбудат со електроди. Линда го прашала еден од лекарите дали нејзиниот сопруг е се уште жив. Наместо да одговори, тој само одмавнал со главата кон неа. Таа талкала по ходниците и на лекарското прашање за обдукцијата одговорила потврдно.