Кога се зборува за патишта што се градат долго во Македонија, најчесто прв е автопатот Кичево-Охрид – има деца што денеска се во средно школо, а биле родени и кога патот почнал да се гради. Но, автопатот Скопје-Блаце, се чини, неоправдано се изостава во таквите дискусии. Таму, само два километра се градеа цели четири години од страна на претходната влада на СДСМ и ДУИ, и пак не се доградија. Автопатот од косовска страна е пуштен во употреба уште во 2019 година, а вкупно 12,5 километри од македонска страна се уште „абер немаат“.

Додека се чекаше автопатот, новата влада на ВМРО-ДПМНЕ и „Вреди“ го обнови постоечкиот, стар пат, за што потроши 3,8 милиони евра.

Сега, вицепремиерот Александар Николоски најавува дека дури на крајот на септември, кога истекува рокот даден од Европската банка за обнова и развој (ЕБОР), ќе биде избрана нова фирма-изведувач на автопатската делница до косовската граница. И да се избере во тој најбрз рок и да ги започне работите веднаш, автопатот тешко дека ќе може да биде готов пред 2028 година, според најавите на Николоски.

„Изминативе девет месеци засилено работиме со Европската Банка за Обнова и Развој на постапките за доизградба на автопатот Скопје-Блаце. Имаме фиксен рок до 30 септември да избереме Изведувач за изградба и откако ќе почне изградбата за две и пол години да го изградиме автопатот, изјави Николоски.

„На Блаце работиме со ЕБОР. За македонски услови тие работат бавно, за нормални развиени држави работат нормално – таму не можат да се случат изненадувања како тука, бидејќи таму подготвителниот период е долг, ама кога ќе се влезе, нема назад. Со нив работевме девет месеци подготвителен период и во моментов понудувачите треба да дадат финансиски понуди. Кај нив тендерите се поделени, прво прават квалификација дали понудувачите ги исполнуваат потребните услови и само тие кои ги исполнуваат техничките услови можат да дадат финансиска понуда затоа што во нашиот случај за јавни набавки се случува ултра неквалитетна фирма да даде ниска цена, вие ја одбивате бидејќи е неквалитетна и Ви се случува да излезат во јавност и да велат не одбивте, а понудивме најниска цена. Со ЕБОР нема вакви работи, прво велат дали технички ги исполнувате условите, се прави селекција и тие фирми што ги исполнуваат условите се поканети да дадат финансиска понуда. На 30 септември треба да имаме избран изведувач, а кога работите со ЕБОР имаме фиксни рокови, за 2,5 години е рокот на завршување на автопатот“, рече вицепремиерот.