Еден од најдобрите кошаркари на сите времиња, Леброн Џејмс, вчера ја возбуди спортската јавност откако најави дека ќе донесе „одлука на сите одлуки“ и дека ќе ја објави денес во 18 часот.

Мнозинството навивачи веруваа дека станува збор за негова иднина во НБА — дали ќе остане во Лос Анџелес Лејкерс, ќе премине во друг клуб или можеби ќе ја заврши својата блескава кариера. Но, на крајот се покажа дека воопшто не се работело за тоа.

Леброн ги „измами“ навивачите и предизвика лавина реакции на социјалните мрежи, бидејќи наместо спортска одлука, ја искористи можноста да промовира нова соработка со брендот на коњак Hennessy.

„Оваа есен, решив да ги пренесам своите таленти во ‘Hennessy V.S.O.P.’,“ изјави Џејмс во кратко видео.

Интересно е што реченицата е речиси идентична на онаа што ја изговори пред 15 години кога го најави својот премин од Кливленд во Мајами — потег кој тогаш го промени текот на неговата кариера, но овојпат, „одлуката“ беше само маркетиншки трик.