Платформите на социјалните мрежи се мета на критики извесен период бидејќи дозволија да се шират дезинформации од следбениците на таканаречениот „крал на токсичната машкост“, контроверзниот инфлуенсер Ендрју Тејт, по неговото апсење во Романија поради истрага за трговија со луѓе. Неколку часа откако Тејт беше приведен, ТикТок и Твитер беа преплавени со објави во кои лажно се тврдеше дека е ослободен и со теории на заговор кои сугерираат дека е наместен. Ваквите објави може да го загрозат интегритетот на истрагата, како и безбедноста на инволвираните, а компаниите кои раководат со социјалните мрежи сносат дел од одговорноста за ширењето дезинформации, лажни вести и теории на заговор, велат експертите.

Триесет и шестгодишниот Ендрју Тејт, британско-американски инфлуенсер познат по своите мизогини ставови, беше уапсен заедно со својот брат Тристан во Романија на 29 декември како дел од истрага за трговија со луѓе, силување и организиран криминал.

Во соопштението на обвинителството, објавено по апсењата пред извесен период, се вели дека четири лица, меѓу кои двајца Британци, се осомничени дека биле дел од криминална група која сексуално експлоатирала жени откако ги намамила со ветувања за врска. Наводно жените биле подложени на „физичко насилство и психолошка принуда преку заплашување, постојан надзор, контрола и уценување со наводни долгови“ и биле принудувани да снимаат порно видеа. Идентификувани се шест потенцијални жртви. Дополнителни детали за конкретните обвиненија против Тејт не се објавени, а на 30 декември беше потврдено дека тој ќе ги помине следните 30 дена во притвор додека романската Дирекција за истрага на организиран криминал и тероризам ја продолжува истрагата.

По апсењето, илјадници обожаватели на социјалните мрежи веќе донесоа своја пресуда.

На ТикТок и Твитер, обожавателите на Тејт без никакви докази тврдеа дека тој бил наместен и ги користеа хаштаговите #freetopG и #tateinnocent. „Луѓето лажат затоа што го мразат Тејт“, напиша еден од нив на Твитер. „Јас сум 100% сигурен дека Тејт е невин.“ „Ослободете го Тејт“. Други, пак, објавија стари видеа кои сугерираа дека Тејт е ослободен од затвор, иако тоа не е точно. Едно видео, кое за еден ден собра 780.000 прегледи на Твитер, покажува дека наводно Тејт е ослободен од притвор.

Пред извесен период, видеото за Тејт со најмногу лајкови на ТикТок беше она што првично се чинеше дека е фактички извештај, но заврши со прашање до гледачите: „Што мислите дека е вистинската причина за апсењето на Тејт? Дали беше Матрикс или Тејт навистина изврши сериозно кривично дело?“

На Твитер, многу објави поврзани со Тејт ја споменуваа #Pizzagate – разоткриената теорија на заговор што му претходеше на КјуАнон (Qanon), во која се тврдеше дека членовите на Демократската партија на САД стојат зад синџирот на сексуална злоупотреба на деца и трговија со луѓе. Корисниците сугерираа дека вистинските педофилски кругови го користат Тејт како жртвено јагне.

Во видеото снимено непосредно пред неговото апсење, по препукувањето на Твитер со активистката за климатски промени, Грета Тунберг, Тејт се појави пред камера со кутија пица пред себе, со цел, како што шпекулираат многумина, на тој начин да потсети дека се работи за наводен заговор.

„Сакаат да го искористат Тејт за да ја прикријат Pizzagate“, напиша еден корисник на Твитер, притоа означувајќи го Илон Маск.

Популарност на Интернет продолжи да расте заедно со дезинформациите

На Тејт му е забранет пристапот на повеќе социјални мрежи поради изјавите дека жените треба да ја сносат одговорноста за сексуалните злоупотреби. Сепак, неговата популарност на Интернет продолжи да расте. Кога во ноември се врати на Твитер, заедно со поранешниот американски претседател Доналд Трамп, собра вкупно четири милиони следбеници.

Истрагата на Обсервер за поранешниот кик-боксер и натпреварувач на Големиот брат во август откри дека ТикТок агресивно ги промовирал неговите содржини на своите корисници, вклучително и на деца и момчиња, и покрај тоа што многу видеа ги кршат правилата на оваа социјална мрежа, кои не дозволуваат мизогинија и лажни налози. На членовите на онлајн академијата на Тејт им беше наложено да објавуваат контроверзни снимки со цел да соберат што е можно повеќе прегледи и лајкови и на тој начин да се зголеми ангажираноста и да се манипулира со алгоритмот.

Учевствуваа илјадници членови на онлајн академијата „Hustler’s University“ и мрежа лажни ТикТок налози. Експертите наведуваат дека станува збор за „еклатантен обид за манипулација со алгоритмот“ и вештачко зголемување посетите. Сепак, за неполни три месеци Тејт доби огромен број нови следбеници и заработи милиони евра, меѓу другото и од членарина за академијата.

ТикТок не направи ништо за да го ограничи ширењето на видеата на Тејт и да ги забрани налозите што ги шират, туку напротив, им го препорачуваше на младите корисници и го лансира во мејнстримот.
Жестоката одбрана на Тејт и ширењето на дезинформации по неговото апсење дополнително ја зголемија загриженоста за влијанието на социјалните медиуми и јавното мислење што тие го создаваат за какви било идни правни постапки. Исто така, повторно се постави прашањето зошто платформите на социјалните мрежи му дозволија на Тејт да стане мејнстрим.

Во неделите по августовската истрага на Обсервер, ТикТок го забрани официјалниот налог на Тејт и рече дека зазема цврст став против содржини коишто содржат омраза, вклучувајќи и мизогинија. На 31 декември, оваа социјална мрежа објави дека започнала систематски преглед на содржините поврзани со Ендрју Тејт, како и дека ќе ги отстрани сите што ги прекршуваат упатствата на ТикТок, односно ќе забранат ширење дезинформации кои им предизвикуваат значителна штета на поединци, на заедницата или на пошироката јавност.

Извор: Demostat – Автор:Миломир Мандиќ

ВИДЕО | Уапсен контроверзниот Ендру Тејт во Романија, кутија од пица го „издаде“ на полицијата