Деновиве на Клиниката за пластична хирургија при Клинички центар „Мајка Тереза“ во Скопје, настана големо недоразбирање и забуна, откако ќерка на пациент на социјалните мрежи обвини дека преку апликацијата „Мое здравје“ открила дека некој го злоупотребил здравственото осигурување на татко ѝ, па тој некој, на здравственото осигурување на татко ѝ се оперирал а материјалот бил пратен на патологија. Ќерката ова го заклучила затоа што во мобилната апликација „Мое здравје“ каде се слеваат информации за сите извршени медицински процедури за здравствените осигуреници, видела дека во петокот, кога нејзиниот татко воопшто не бил во болницата – на негово име бил издаден упат за патологија.

Внатрешната истрага на болницата покажа дека ова не е точно, никој не се оперирал на име на пациентот „фантомски“, туку упатот бил издаден затоа што вистинскиот пациент инаку опериран пред 2 месеци на Клиниката морало да се доиследи и патологија за тоа побарала нов упат. Стариот упат, имал важност од 1 месец, па затоа морало да биде издаден нов, кој се однесувал на истиот пациент.  

Клиниката формираше стручна комисија која го разгледа севкупното лекување на пациентот и утврди дека тој се оперирал на Клиниката за пластична хирургија во април, кога материјалот после операцијата бил испратен на патологија. Но, во петокот од патологија побарале нов упат од пластична хирургија за да може да направат дополнително иследување (имунохистохемија) за пациентот. Имунохистохемија се врши само за околу 10 проценти од материјалите и за неа се бара дополнителен упат според моменталните воспоставени процедури меѓу здравствените установи.

Клиниката за пластична хирургија, патологија и Мој термин во наредниот период ќе најдат модус сите испитувања да се вршат на првичниот упат, за да се избегнат вакви недоразбирања.

Инаку, злоупотребата на упати за да се цедат пари од Фондот за здравство, е докажана и вистинска појава во македонското здравство, но не и во овој конкретен случај.

Еден пример на реална злоупотреба беше откриен минатата недела. Се работеше за матичен гинеколог што злоупотребувал лични податоци на негова пациентка и си играл со дијагнози, на начин што наместо неа да ја испрати на ПАП-тестот што ѝ следува еднаш на 3 години бесплатно и е покриен од Фондот за здравство, издал упат за ПАП-тест со кој го лажел Фондот за здравство дека пациентката е прегледана, иако таа воопшто не била прегледана. Телевизија „Телма“ емитуваше телефонска снимка што ја направила пациентката и на која докторот тоа ѝ го признава. Со ПАП тестот се открива рак на грлото на матката, но на територијата на Македонија матични гинеколози ја манипулираат скрининг-програмата за рано откривање на рак на грлото на матката која ја спроведува Министерството за здравство. За таа цел издаваат упати на име на жени небаре тие се прегледале, а тие воопшто не се прегледале. Парите од ФЗОМ за вакви упати, сепак легнуваат на контото на гинеколошките ординации. Жените пак чии лични податоци се злоупотребени го губат правото да се прегледаат на државно и рано да им биде детектиран евентуален рак.

Директорот на Фондот за здравство Сашо Клековски за „Слободен печат“ вели дека упати за прегледи се издаваат од „Мој Термин“ при Министерството за здравство. ФЗО нема увид и контрола на издавањето на овие упати. Јавните здравствени установи извршената услуга ја вклучуваат во извештајот кој го доставуваат до ФЗОМ.

Од ФЗОМ велат дека граѓаните шот се сомневаат дека во нивното досие се направени манипулации, злоупотреби, или пак се наведени прегледи што тие не ги извршиле, тоа може да го пријават во Фондот за тој да изврши контрола.