Директорката на Клиничката болница „Д-р Трифун Пановски“ во Битола, Д-р Елизабета Ивановска, вели дека е лажна веста дека уште едно новороденче починало по породувањето на мајката во оваа болница, која денеска ја објавија некои медиуми.

– Ја известувам јавноста дека лажна е веста за наводно починато бебе по породување на мајката. Напротив, во текот на денешниот ден регистриравме раѓање на здраво машко бебе, и тоа е 190-то новороденче од почетокот на оваа година, вели Ивановска.

Д-р Ивановска од неодамна е директорка на битолската болница. Претходниот директор, д-р Александар Обедниковски, се повлече од функцијата од морални причини, откако за една недела починаа петгодишната Јана Христовска, како и новороденче. И во двата случаја, родителите на починатите деца обвинуваа за лекарска негрижа и несовесно постапување на докторите во болницата.