Екипата на Алкалоид подготвна ќе го дочека реваншот против Баја Маре во четвртфиналето од ЕХФ Европскиот куп.

Македонскиот претставник одигра одличен натпревар во Романија, но во последната секунда остана без победа (31-31).

Во реваншот Алкалоид сака да ја продолжи серијата на добри резултати во Европа и да се избори за место помеѓу најдобрите четири во ова натпреварување.

„Овој меч е од исклучителна важност за клубот, македонскиот ракомет и спортот воопшто. Горд сум на моите играчи за начинот на кој одиграа во Романија, особено со оглед на околностите што ги следеа пред, за време и по натпреварот. Тимот е составен претежно од млади македонски играчи, што носи дополнителна одговорност, но и мотив“, изјави Лазаров.

Лазаров и предупреди на квалитетот кој го има романскиот претставник.

„Баја Маре е искусен тим, составен од репрезентативци и десетина странски играчи. Првиот дуел беше исполнет со груба игра, во која домаќините имаа само две исклучувања, а секој старт им беше исклучително валкан. Се надевам дека овојпат судиите ќе ги санкционираат нивните грубости. Ќе биде тежок натпревар, но верувам дека со додатен напор и поддршка од симпатизерите можеме да избориме полуфинале“, истакна стратегот на „фармацевтите“.

Натпреварот помеѓу Алкалоид и Баја Маре се игра в недела од 19:00 часот.