Министерот за надворешни работи на Русија, Сергеј Лавров, денес изјави дека Западот ги турка Бошњаците во БиХ по погрешен пат, односно кон уништување на Дејтонскиот мировен договор.

„Наместо да се почитува овој договор, Западот ги турка Бошњаците во конфликт со Србите и Хрватите“, изјави Лавров пред новинарите во Москва по средбата со претседателот на Република Српска, Милорад Додик.

Лавров нагласи дека претседателот Додик и раководството на Република Српска со децении се борат доследно да го почитуваат Дејтонскиот мировен договор, додека Западот и неговите претставници го кршат.

Тој истакна дека Босна и Херцеговина функционира врз основа на рамнотежата на трите составни нации и нагласи дека кршењето на консензусот што е негова основа е злосторство и повик за уште една војна на Балканот.

„Тоа е обид за провокација со цел да се спроведе насилно сценарио за употреба на груба воена сила, за потиснување на Србите и кршење на нивните права, како што се случува во Косово и Метохија“, рече Лавров.

Тој им порача на сите вклучени во политиката во БиХ да бидат искрени и да ги исполнат своите обврски.

„Не сум сигурен дека властите во Сараево и европските престолнини ќе ме слушнат, но ова е нашиот став и потребно е да се бориме за правда и фер игра“, нагласи Лавров, објави Срна.