Струмичкиот градоначалник Костадин Костадинов со објава на социјалните мрежи му упати закани на Драган Павловиќ Латас откако новинарот го споменал таткото на Костадинов на навредлив начин.

„Да кажеш дека татко ми „ја искоцкал куќата“ и со тоа да го ставиш на маса за потсмев тоа не е хумор. Тоа не е критика. Тоа е отворен воен акт кон моето семејство. А кога ќе удриш по мртов човек – знаејќи дека не може да ти одговори – тогаш ќе одговараш на живите. На нас. На мене. На моите. На сите што ќе се родат со нашето презиме“, стои меѓу другото во пораката на Костадинов.

Костадинов најави дека ова нема да остане неказнето.

„Цела фамилија Костадинови те чека. Не за тужба. Не за медиумски циркус. Туку за суд што ние го држиме. Според наши закони. Наши правила. Наши вредности. Од Малешевијата до Струмица – кај нас кога ќе ја чепнеш честа на мртов, правдата не се моли. Се зема. Ова што го направи ќе го носиш како клетва. Ќе ти стои зад секоја реченица. Ќе те демне по секој агол. Ќе ти дојде кога најмалку очекуваш“, напиша Костадинов.

Со реакција се јавија од ВМРО-ДПМНЕ од каде што бараат итна разрешница на говорот на омраза од страна на Костадинов врз Латас.

„Градоначалникот на Струмица и близок соработник на Заев, оди по неговите стапки. Едниот живи луѓе јадеше, овој сега се заканува на новинари дека ќе се осветува на свој начин. Матрицата на СДС е таа и нема менување. Позади ваквата нарачка за линч на новинар седат директно Венко Филипче и Зоран Заев. Ова се правите лица на соработниците на Заев и Филипче. Повикуваат на убиства на новинари, ова го нема никаде. Партијата чиј член и градоначалник е Костадинов, молчи и не се оградува од коментарите на Костадинов“, стои во сооопштението од партијата на Христијан Мицкоски.