Бади е новиот пријател на Бен, Рекс и Били, кои се верни соработници на царинските службеници во борбата против нелегалната трговија со наркотици, оружје и пари.

Како што објавија од Царинската управа, К-9 единицата располага со кучиња од расата шпрингер шпаниел и новото куче кое е од расата лабрадор. Бади е донација од Германското друштво за меѓународна соработка (ГИЗ). Овие кучиња трагачи учествуваат во повеќе откривачки акции и речиси 90 проценти од акциите се успешно реализирани.

-Сузбивањето на организираниот криминал и сивата економија е еден од клучните приоритети на Царинската управа. Во оваа борба царинските кучиња се од особена важност и успешно се користат при спречувањето на нелегален транспорт на наркотици, оружје и пари – велат од Царина.

Бади успешно ја заврши специјализираната обука за откривање на пари, дрога и оружје, а на последниот дел од обуката  присуствуваа директорот Стефан Богоев и заменик директорот Муарем Асани.

Богоев присуствуваше и на практична вежба на Аеродромот Св. Апостол Павле во Охрид, каде беше демонстрирано откривање на недозволена трговија од страна на мобилните тимови со помош на царинските кучиња во реални услови.

Директорот на Царина изрази благодарност до Германското друштво за меѓународна соработка за досегашната поддршка и истакна дека Царинската управа е подготвена за понатамошно интензивирање на соработката во овој домен бидејќи благодарение на исклучителните способности на кучињата трагачи покрај што им се олеснува работата на цариниците, значително се подобруваат резултатите при спречувањето на шверцот и недозволената трговија – додаваат од Царина.