Изборите фер и демократски како што доликува на земја членка на НАТО со почнати преговори со ЕУ, е првичната оценка на СДСМ по завршувањето на гласањето на двојните избори, парламентарните и вториот круг од претседателските избори.

Портапролката на СДСМ, Богданка Кузеска вечерва изјави дека граѓаните можеа слободно да ја искажат својата волја и им се заблагодари на сите што излегле на изборите, особено на оние кои гласале за СДСМ, Коалицијата за европска иднина и кандидатот за претседател Стево Пендаровски.

– Граѓаните покажаа демократски капацитет, а институциите зрелост. Граѓаните ќе одлучат по кој правец натаму ќе се движи Македонија, изјави Кузеска и додаде дека СДСМ никогаш не бил кочничар на демократските избори и процесите што ја носат државата напред.

Во однос на информациите за тивок бојкот на изборите, кажа дека „за бојкот секоја партија одговара пред граѓаните како се однесувала“.

– Секоја партија за тоа како настапи на овие избори треба да одговори пред себе и пред граѓаните. СДСМ и кандидатот кој го поддржува од почетокот повикува на масовност, да се искористи правото на глас како за парламентарните, така и за претседателските избори, рече Кузеска.