Ана Крстаноска е млада и креативна жена, која стои зад еден од најубавите инстаграм-профили за храна кај нас – „Ана кичен корнер“ (ana_kitchen_corner).

Готвењето ѝ е вистинска пасија и хоби на кое му пристапува со голема љубов и посветеност.

– Спремањето храна го доживувам како мое хоби, кое го надополнувам со многу љубов и внимание секогаш кога сум во можност. Среќна сум кога им спремам нешто вкусно на моето семејство и моите пријатели и токму тоа ми ја полни душата со позитивна енергија – вели таа.

Денеска ви го претставуваме нејзиниот рецепт за сникерс бајадера.

– Знаете дека секогаш едноставните работи се најдобри? Така спонтано настана и оваа совршена едноставна бајадера, која потсетува на чоколадото сникерс – вели Крстаноска.

Потребни состојки:

– 300 г шеќер
– 250 г вода
– 200 г маргарин / путер
– 100 г чоколадо за готвење
– 2 лажици какао
– 200 г мелени бисквити
– 200 г ситно скршени бисквити
– 400 г сечкани кикирики
– 100 г сусам (печен)

За глазура

– 200 г чоколадо + 6 лажици масло

Подготовка:

Ставете го шеќерот со водата да зоврие. Потоа додајте ги маргаринот, чоколадото и какаото. Ова оставете го да врие околу пет минути со мешање. Тргнете го на страна и додајте ги бисквитите, кикириките и сусамот.

Сè се става на хартија за печење и се распределува со дебелина од околу еден и пол прст. Може да го ставите и во обичен плех од шпорет или во каков било калап. Дебелината си ја одредувате вие.

Што се однесува до глазурата, растопете го чоколадото со маслото и распоредете го над смесата. Наросете сечкани или мелени кикирики.