Ана Крстаноска е млада и креативна жена, која стои зад еден од најубавите инстаграм-профили за храна кај нас – „Ана кичен корнер“ (ana_kitchen_corner).

Готвењето ѝ е вистинска пасија и хоби на кое му пристапува со голема љубов и посветеност.

– Спремањето храна го доживувам како мое хоби, кое го надополнувам со многу љубов и внимание секогаш кога сум во можност. Среќна сум кога им спремам нешто вкусно на моето семејство и моите пријатели и токму тоа ми ја полни душата со позитивна енергија – вели таа.

Денеска Ви го претставуваме нејзиниот рецепт за штрудла со јаболко и цимет.

– Миризлива ароматична штрудла со посебен шмек на цимет, ванила и јаболко. Нели звучи фантастично? – вели Крстаноска.

Потребни состојки:

– 500 гр готови кори
– 8/9 средни јаболки
– 1 пакетче цимет
– 1 пакетче ванилин шеќер
– 2 лажици шеќер
– 50 гр гриз
– 150 мл масло
– газирана вода
– шеќер во прав за посипување

Подготовка:

Излупете ги јаболките и изрендајте ги со ренде. Потоа додадете им го циметот, шеќерот и гризот.
Измешајте го маслото со газираната вода.

Земете една кора и премачкате ја со смеса од масло и вода од сите страни. Над неа наредете ја втората кора, која исто така се попрскува и над неа хоризонтално само на долниот дел врз цела должина ставате од смесата со јаболка.

Внимателно виткате како ролат и ставате врз хартија за печење.

Постапката ја повторувате и со останатите кори кои ги редите едни до други.

Се сечат пред да ги печете по посакувана должина и ги премачкувате со останатата смеса од вода со масло.

Печете во загреана рерна на 180 степени триесетина минути, додека не зарумени.

Откако ќе се излади, наросете со шеќер во прав.