Ана Крстаноска е млада и креативна жена, која стои зад еден од најубавите инстаграм-профили за храна кај нас – „Ана кичен корнер“ (ana_kitchen_corner).

Готвењето ѝ е вистинска пасија и хоби на кое му пристапува со голема љубов и посветеност.

– Спремањето храна го доживувам како мое хоби, кое го надополнувам со многу љубов и внимание секогаш кога сум во можност. Среќна сум кога им спремам нешто вкусно на моето семејство и моите пријатели и токму тоа ми ја полни душата со позитивна енергија – вели таа.

Денеска Ви го претставуваме нејзиниот рецепт за манчмалоу колач.

– Толку едноставен, а толку вкусен. Дефинитивно, овој колач ми е на листата со омилени слатки нешта. Љубов на прво залче – вели Крстаноска.

Потребни состојки:

За тесто

– 6 жолчки

– 7 лажици шеќер

– 200 мл млеко

– 100 мл масло

– 1/2 прашок за печиво

– 3 лажици какао

– 6 лажици брашно

За бел крем:

– 6 белки

– 1 ванилин шеќер

– 10 лажици шеќер

– 10 лажици шеќер

– 4 лажици вода

За глазура:

– 200 гр чоколадо

– 5 лажици вода

– 5 лажици масло

Подготовка:

Издвојте ги белките од жолчките. Додајте го шеќерот во жолчките, матете ја смесата, па додајте ги маслото и млекото. Потоа додајте го брашното, помешано со печиво и какао. Матете за да се спојат состојките, па добиената смеса истурете ја во намрсено тавче и печете на 200 степени, околу 15 минути.

Во меѓувреме, изматете ги белките како шлаг, додајте го шеќерот и матете додека не добиете погуста структура. Тогаш се става шеќерот со водата да зоврие.

Потоа малку помалку се додава во „шлагот“, матејќи додека не се стврдне доволно, односно да не е течно. Ова го правите некои десетина минути.
Многу е важно шлагот да не биде течен.

Потоа се додава врз готовата основа и се распоредува убаво од сите страни. Ставете во рерна многу кратко, колку да се зацврсти кремот. Тоа може да го проверите кога со прст ќе допрете и нема да ви лепи.

Чоколадото се топи на пареа со маслото и водата, па се става врз белиот дел.

Сечете на коцки и послужувате.

На здравје!